William Atherstone

William Guybon Atherstone (Sion Hall, Nottingham, 29 Mei 1814 - 26 Junie 1898) was 'n Suid-Afrikaanse geneesheer, chirurg, natuurkenner, geoloog en politikus in die Kaapkolonie. Atherstone was die eerste dokter wat narkose in Suid-Afrika gebruik het toe hy in Junie 1847 in Grahamstad 'n been van 'n pasiënt moes afsit.

William Atherstone
Gebore	William Guybon Atherstone 27 Mei 1814 Nottingham, Engeland
Sterf	26 Maart 1898 (op 83) Grahamstad, Kaapkolonie
Nasionaliteit	Verenigde Koninkryk
Beroep	geneesheer, geoloog

Hy kom in 1820 saam met sy gesin aan in die Kaapkolonie. Nege jaar later gaan hy na die Uitenhage-akademie onder dr. Rose-Innes en tree daarna by sy vader, John Atherstone, distriksgeneesheer van Albanie, in diens as leerjonge. In 1834 word hy gedurende die Sesde Grensoorlog as geneesheer van sir Harry Smith aangestel. Hy gaan studeer in Dublin, Ierland, en behaal in 1838 die graad M.D. aan die Universiteit van Heidelberg en keer terug na die Kaap, waar hy vennoot van sy vader word. In 1847 gebruik hy vir die eerste maal in Suid-Afrika eter tydens 'n operasie. Hy stel veel belang in die geologie en lewer in 1856 in Grahamstad 'n belangrike lesing oor die onderwerp. In 1867 verklaar hy dat die blink klippie wat naby Hopetown gevind is 'n diamant is en so begin die geskiedenis van diamantdelwery in Suid-Afrika. In 1874 gaan inspekteer hy die goudveld van Lydenburg en in 1881 word hy lid van die Kaapse Wetgewende Vergadering vir Grahamstad. Drie jaar later word hy benoem as lid van die Wetgewende Raad, die Kaapse koloniale kabinet van destyds. Swak sig dwing hom in 1887 om sy praktyk te laat vaar en uit die Wetgewende Vergadering te tree. Hy bly nietemin aktief en op sy aandrang word die eerste gesondheidslaboratorium, die Colonial Bacterial Institute, in 1891 gestig. In 1896 word hy as voorsitter van die vierde Suid-Afrikaanse Mediese Kongres in Grahamstad verkies. Hy sterf twee jaar later.

'n Koshuis van Rhodes-universiteit is ter ere van hom Atherstone House genoem.^[1]