Thomas Henry Grocott

Thomas Henry Grocott was die stigter van Grocott's Mail in Grahamstad in die Oostelike Provinsie en medestigter asook jare lange voorsitter van die Nasionale Persunie.

Hy is in Liverpool gebore waar hy 'n vakleerling was by die Liverpool Mail van Mei 1854. Hy het uiteindelik 10 jaar by dié koerant deurgebring. In 1864 besoek mnr. R.W. Murray van die Great Eastern Star (wat jare later letterlik per ossewa na die Witwatersrand verplaas is en vandag nog as dagblad verskyn) Engeland. Hy ontmoet Grocott en bied aan dat hy Suid-Afrika toe kom en in die personeel van sy koerant kom werk. Die jong verslaggewer aanvaar die aanbod en vestig hom op Grahamstad.

Grocott is binne sy eerste vyf jaar in die Oos-Kaap getroud met Eliza Jane Miller, dogter van eerwaarde Miller, medestigter van die Baptistekerk in Suid-Afrika. Drie kinders is uit die huwelik gebore, Ida, Emma en William Ellington. Net die seun is getroud, terwyl die dogters vir hulle 'n gerieflike huis by Milnerstraat 2A op Grahamstad laat bou het waarin die gesin Grocott vandag nog woon.

Grocott sluit eers in 1869 'n vennootskap met J.V. O'Brien, maar dit hou skaars 'n jaar. Daarna rig hy 'n drukkery op en gee op 11 Mei 1870 die eerste Grocott-koerant uit, naamlik die Grocott's Free Paper. Na stoomkrag ingevoer word om die drukmasjiene aan te dryf, word die koerant op 2 Januarie 1872 die tweeweeklikse Grocott's Penny Mail, wat binne enkele jare in die hele Kaapkolonie, Vrystaat en Transvaal versprei is. Tien jaar later begin die koerant drieweekliks verskyn. In Augustus daardie jaar help Grocott mee aan die stigting van die Nasionale Persunie, waarvan hy van 1902 tot met sy dood in 1912 voorsitter was.

Hy was nou betrokke by die lief en leed van Grahamstad se inwoners en onder sy leiding het die koerant in 1899 die "Christmas Cheer Fund" gestig wat weduwees en weeskinders van die "First City Volunteers" ondersteun het. Die fonds bestaan meer as 'n eeu later steeds.

Hy is op 7 Oktober 1912 in Grahamstad oorlede.^[1]

• Geskiedenis van Grocott's Mail^{[dooie skakel]}