Wikipedia:Beeld van die week/2007
Hierdie is die argief van al die beelde wat tydens 2007 as spogbeelde op die voorblad gepryk het.
2007
[wysig bron]Week 41
'n Nagaansig van Montréal se stadsaal op 'n koue Januarie-aand. Die stadsaal is ontwerp deur die argitekte Henri-Maurice Perrault en Alexander Cowper Hutchison en is tussen 1872 en 1878 gebou. Die gebou is geleë in die middel van Ou Montréal te 275 Notre-Dame-straat.
In 1967 het Charles de Gaulle, toe die president van Frankryk, sy bekende Vive le Québec libre (lank lewe 'n vrye Quebec)-toespraak vanaf die balkon van die gebou gelewer.
Fotograaf: David Iliff.
besigtig
Week 42
'n Gewone heksagoniese dendritiese sneeuvlokkie, vergroot met 'n lae-temperatuur skanderende elektronmikroskoop. Die beeld is kunsmatig gekleurd om die sentrale vlokkie te beklemtoon.
Sneeuvlokke bevat tot by 95 persent lug en het sodoende 'n groot oppervlakte. Vanweë hul hoër lugweerstand val hulle in vergelyking met ander neerslae relatief stadig; hulle snelheid van omtrent 4 km/h is aansienlik laer as dié van byvoorbeeld gemiddelde sterk reën met 20 km/h of hael wat deur baie hoë snelhede gekenmerk word.
besigtig
Week 43
'n Onvolwasse berghaan (Terathopius ecaudatus). Die berghaan is 'n medium-grootte arend in die voëlfamilie Accipitridae. Dié vroulike, twee-jaar oue berghaan het 'n ligte bruin kleur, maar sal met ses of sewe jaar dieselfde pikswart veredos en kenmerkende rooi snawel as ander volwasse berghane kry.
Fotograaf: Paul Friel.
besigtig
Week 44
'n Portret van 'n jong Padaung-meisie van Mianmar in 'n vlugtelingskamp in Noord-Thailand. Die Padaung-bergvolk (ook genoem die Kayan) is deel van die Karenni, 'n Tibetaanse-Mianmarese etniese groep. Die Padaung-volk het in die 1990's, as gevolg van konflik met die militêre regieme in Mianmar, na Thailand gevlug, waar hulle tot vandag in klein vestigings woon.
Die nekringe wat die Padaung-vroue dra word van geelkoper gemaak en word vir die eerste keer om 'n meisie se nek geplaas wanneer sy ongeveer vyf jaar oud is. Elke rol ringe word vervang met 'n langer rol soos die gewig van die koper die sleutelbeen na onder druk en die ribbekas saamdruk. Die Ndebele-stam van Suid-Afrika het 'n soortgelyke gebruik.
Fotograaf: David Iliff
besigtig
Week 45
Die ruïnes van San Francisco lê aan't smeul na 'n aardbewing die stad op 18 April 1906 getref het. Die aardbewing en die brand wat dit tot gevolg gehad het word steeds onthou as een van die ergste natuurrampe in die geskiedenis van die Verenigde State van Amerika. Die dodetal van die aardbewing en die daaropvolgende brand, 'n beraamde 3000, verteenwoordig die grootste verlies van lewens tydens 'n natuurramp in die geskiedenis van Kalifornië. Die ekonomiese impak van die aardbewing was ook vergelyk met dié van die onlangse Orkaan Katrina.
besigtig
Week 46
Saturnus tydens 'n sonsverduistering op 15 September 2006. Die gasreus hang tussen die son en die Cassini-ruimtetuig en die resulterende verduistering het voorheen onbekende ringe onthul.
Saturnus is die sesde planeet van die Son af en die tweede grootste planeet in die sonnestelsel na Jupiter. Die planeet het 'n kenmerkende ringstelsel wat hoofsaaklik bestaan uit ysdeeltjies, klipperige afval en stof.
Hierdie aansig was geskep deur die samestelling van 165 beelde wat deur Cassini oor 'n tydperk van 3 ure op 15 September 2006 geneem is.
Foto-erkenning: NASA/JPL/Space Science Institute
besigtig
Week 47
'n Panoramiese uitsig oor New York vanaf die waarnemingsdek van die Rockefeller-sentrum.
Met 'n 8,2 miljoen inwoners en 'n area van ongeveer 800km² is New York (amptelik New York Stad) tegelykertyd die stad met die grootste bevolking én die digbevolkste stad in die Verenigde State van Amerika. Die stad is 'n sentrum vir internasionale handel, politiek, vermaak en kultuur, en is een van die wêreld se groot globale stede (saam met Londen, Tokio en Parys). Die stad beskik oor 'n versameling van museums, kunsgalerye, teaters, mediafirmas, internasionale organisasies en korporasies en effektebeurse. Die stad is ook die tuiste van die Verenigde Nasies, tesame met al die internasionale takke wat daarmee geassosieer word.
Foto-erkenning: Daniel Schwen
besigtig
Week 48
Weerlig tref die Eiffel-toring op 3 Junie 1902, 21:20.
Die Eiffel-toring is die bekendste baken van die Franse hoofstad, Parys. Die staaltoring, ontwerp deur die Franse ingenieur Alexandre Gustave Eiffel, is 300,5 meter hoog (sy antenne is 320,8 meter). Die toring dien vadag as uitsigpunt en uitsaaitoring.
Hierdie is een van die vroegste fotos van weerlig in 'n stedelike omgewing.
Foto-erkenning: M. G. Loppé
besigtig
Week 49
'n Leeu (Panthera leo) in Namibië. Leeus is die tweede grootste katspesie naas die tier. Mannetjies soos hierdie word maklik herken aan hulle maanhare en weeg 150–250 kg.
Die spesifieke leeu is onder die sorg van die AfriCat-stigting by Okonjima, Namibië, wat na beseerde of weeskatte omsien tot hulle na die wild teruggekeer kan word.
besigtig
Week 50
Ysvlotte op 'n gletsermeer van Eyjafjallajökull, een van Ysland se kleiner gletsers. Die gletser se yskap dek 'n vulkaan (1666m hoog) wat sedert die begin van die huidige Ystydperk relatief reëlmatig uitbars. Die laaste uitbarsting was vanaf 1821 tot 1823, wat 'n dodelike gletserloop veroorsaak het. Die vulkaan se krater het 'n diameter van ongeveer 3-4km en die gletser dek self 'n oppervlak van ongeveer 100 km².
Foto-erkenning: Andreas Tille
besigtig
Week 51
7 Augustus 1957 by die Toetsterrein in Nevada in die Verenigde State. 'n Tydelik vryvlieënde lugskip word tydens die toets van 'n kernwapen deur die skokgolf ten gronde gestuur. Die lugskip was onbeman en meer as 8 km vanaf die impaksgebied. Die doel van die eksperiment was om die effek van die skokgolf en die hitte waar te neem. Links, op die grond, is die oorblyfsels van die voorste deel van die lugskip.
'n Kernwapen is 'n wapen wat sy vernietigende krag kry van kernreaksies verkry deur die splitsing of samesmelting van atome (kernfusie). Die gevolg is dat selfs 'n klein kernwapen wat 'n klein aantal energie afgee steeds merkwaardig sterker is as die grootste konvensionele plofstowwe en 'n enkele wapen is daartoe in staat om 'n hele stad te vernietig.
Foto-erkenning: Nasionale Kernsekuriteitsadministrasie / Kantoor van die Nevada Toetsterrein
besigtig
Week 52
'n Jong Himba-vrou en jong seun in Namibië. Die Himba is 'n etniese groep van ongeveer 20 000 tot 50 000 mense wat in die noorde van Namibië woon. Hulle is 'n nomadiese herdersvolk en nou verwant aan die Herero-volk, wat dieselfde taal (Herero) praat.
Namibië is die tweede mees yl bevolkte land ter wêreld, alhoewel die bevolking van omtrent 600 000 mense in 1961 tot 'n geskatte 2 083 405 in 2007 gegroei het. Die land word egter deur 'n hoogs onegalige bevolkingsverspreiding en 'n groot etniese diversiteit gekenmerk; die grootste deel van die Namibiërs woon in die vrugbare streke van die noorde en in die stedelike gebiede van die land.
Foto-erkenning: Yves Picq
besigtig