Evening Post
Evening Post was 'n aandblad in Port Elizabeth van 1950 tot die sluiting van die koerant einde 2000 (die aankondiging is op 17 Oktober 2000 gedoen), enkele maande na die viering van sy vyftigjarige bestaan in Mei daardie jaar.
Die rede vir die sluiting was verliese en 'n afname in verkope sowel as reklame-inkomste. Soos Ric Wilson, uitvoerende redakteur van Johnnic Publishing se Port Elizabethse koerante met sy aftrede opgemerk het: "Die koerant was die slagoffer van 'n oorverhandelde mark en die mislukte poging om dit te herposisioneer as 'n koerant wat uitsluitlik op die swart mark gerig was. Ons het tereg 'n gaping in die mark raakgesien, maar op daardie tydstip, op hierdie plek, was daar nie 'n mark in die gaping nie, en die sirkulasie het afgeneem en die advertensies daarmee saam."
Die eerste redakteur was John Sutherland, wat die grondslag gelê het vir die beginsels van regverdigheid en vryheid wat die koerant regdeur die apartheidsera voorgestaan het. Die Evening Post was die eerste vername koerant in die land wat 'n swart, vroulike redakteur, Lakela Kaunda, aangestel het. Sy het die koerant tot begin Oktober 2000 toe sy 'n pos as hoof van pres. Thabo Mbeki se kommunikasiekantoor aanvaar het.
Die koerant het sy fokus in die jare negentig verander na Port Elizabeth se ontluikende swart mark, maar Johnnic Publishing het dit in 2000 gesluit toe die eksperiment tot verliese aan inkomste sowel as lesers gelei het. Sestien maande later, op Woensdag 13 Maart 2002 het Johnnic Publishing 'n weeklikse bylaag tot The Herald en losstaande publikasie, Ilizwi, van stapel laat loop.
Die Evening Post se sirkulasie was sowat 25 000 ten tyde van sy sluiting.
Sien ook
[wysig | wysig bron]Bronne
[wysig | wysig bron]- (af) Evening Post gaan binne ses weke sluit, Die Burger, 18 Oktober 2000. URL besoek op 2 Januarie 2016.
- Biografie van die verslaggewer Mike Oettle