Groen Berge
Die Groen Berge (Engels: Green Mountains) is 'n bergreeks in die Amerikaanse deelstaat Vermont, wat oor sowat 400 kilometer (250 myl) strek. Die mees bekende bergspitse in die gebied is:
- Mount Mansfield, 4393 voet (1339 meter), die hoogste bergspits in Vermont
- Killington Peak, 4241 voet (1292 meter)
- Mount Ellen, 4083 voet
- Camel's Hump, 4083 voet
- Mount Cleveland, 3500 voet
- Mount Roosevelt, 3580 voet
- Mount Wilson, 3756 voet
- Glastenbury Mountain, 3748 voet (1142 meter)
Die Groen Berge word as 'n deel van die Appalagge beskou, 'n uitgestrekte gebergte, wat van Nieu-Engeland in die noorde tot by die deelstaat Georgia in die suide strek. Ander nabygeleë bergreekse sluit die Wit Berge (White Mountains) van New Hampshire in die ooste en die Berkshires-reeks van Massachusetts in die suide in. In die weste, anderkant die Champlainvallei en die Champlainmeer, lê die Adirondack-gebergte van New York, wat in geologiese opsig deel uitmaak van die Kanadese Skild.
Die Groen Berge behels vyf bergspitse met 'n hoogte van meer as 4 000 voet bo seevlak, waarvan drie (Mount Mansfield, Camel's Hump en Mount Abraham) deur Alpynse flora gekenmerk word. Drie van hulle beskik oor skioorde teen hulle berghellings. Die Long Trail, 'n wilderniswandelpad, wat tussen die suidelke en noordelike grense van die deelstaat loop en oor 'n derde van sy lengte met die Appalachian Trail saamloop, loop langs die belangrikste bergspitse van die Groen Berge.
Terwyl 'n aantal van die bergspitse deur Alpynse flora gekenmerk word, word veral die noordelike dele van die bergreeks tussen 'n hoogte van sowat 3 000 tot 3 500 voet en die boomgrens deur digte woude oorheers, wat tipies aan die hoër breedtegrade van die noordelike halfrond is. Hierdie soort woud is veral in die Groen Berge gevestig, aangesien die baie koue temperature, sneeuvalle en winde van Vermont se winter deur ander spesies nie verdra word nie.
Vermont het nie net sy bynaam ("The Green Mountain State") aan die Groen Berge te danke nie. Die deelstaat is vernoem na die Franse weergawe ("les Monts verts" of soms "les Verts Monts"). Die Republiek van Vermont, waarna in die omgangstal ook as die Republiek van die Groen Berge ("the Green Mountain Republic") verwys is, het in die tydperk tussen 1777 en 1791 bestaan.
|
Deelstaat Vermont |
|---|---|
| Onderwerpe |
Grondwet | Kultuur | Geografie | Regering | Geskiedenis | Ekonomie | Stede | Nedersettings in Vermont |
| Hoofstad | |
| Streke |
Champlainvallei | Groen Berge | Mount Mansfield | Northeast Kingdom |
| Distrikte |
Addison | Bennington | Caledonia | Chittenden | Essex | Franklin | Grand Isle | Lamoille | Orange | Orleans | Rutland | Washington | Windham | Windsor |
| Stede |
Barre | Burlington | Montpelier | Newport | Rutland | South Burlington | St. Albans | Vergennes | Winooski |
| Dorpe |
Bennington | Calais | Stowe | Williston |