Gereformeerde kerk Volksrust

Gereformeerde kerk Volksrust
Vorige naam	Martinus Wesselstroom Amersfoort
Sluit in	Amersfoort Memel Perdekop Volksrust Wakkerstroom
Klassis	Piet Retief
Huidige predikant(e)	Dr. J.J.J. (Kobus) Erasmus
Belydende lidmate	88
Dooplidmate	14
Adres	Schoonstraat 41 Volksrust
Geskiedenis
Stigtingsdatum	1897
Afgestig van	Middelburg, Kaap
Eerste predikant	Derk Rumpff (1910–'13)

Die Gereformeerde kerk Volksrust is die derde oudste gemeente in die GKSA se Klassis Piet Retief. Einde 2015, toe hier 102 belydende en 14 dooplidmate was, was dit die sesde grootste van die 10 gemeentes in dié Klassis. In 2001 was die syfers onderskeidelik 117 en 52 en in 1960 118 en 86.

Lidmate van die latere gemeente het eers in verskillende provinsies gewoon in die streek waar die destydse Transvaal, Natal en Oranje-Vrystaat mekaar ontmoet het. In 1893 het lidmate hier as die Gereformeerde kerk Martinus Wesselstroom (die latere Wakkerstroom) afgestig. In 1905 het die gemeente se naam verander na Amersfoort. Ná die Tweede Vryheidsoorlog het Volksrust as spoorwegsentrum ontwikkel en het die gemeente se swaartepunt daarheen verskuif. Vandag nog is Amersfoort, Wakkerstroom asook Memel in die Vrystaat deel van die gemeente Volksrust.

Ds. Derk Rumpff die nuwe kerkgebou op Volksrust se hoeksteen in 1912 gelê. Dis ontwerp as ’n saalkerk met ’n spitsdak en Neo-Gotiese vensters. Die Gereformeerde kerk Heidelberg het die preekstoel en kerkklok aan die gemeente geskenk. Op 8 Augustus 1931 het Volksrust ’n orreltjie present gekry van ’n lidmaat, ene Joubert.

Op 16 November 1957 het die gemeente se vrouelidmate ’n Kanselbybel geskenk en in 1963 het ’n lidmaat, Tommie Labuschagne, die houtwerk aan die preekstoel voltooi, ’n jaar nadat die ou orreltjie deur ’n pyporrel vervang is. Die orrel is geskenk deur Kota Badenhorst, al was hy nie ’n lidmaat van die Gereformeerde Kerk nie. In 1975 is die kerkbanke wit geverf en die vloer met rooi matte bedek. Hierdie mooi, geskiedkundige kerkie is vandag (2017) nog in gebruik nadat dit in 1991 vergroot is, toe ds. G.J.V.S. Roos op 6 Mei daardie jaar ’n nuwe hoeksteen gelê het. Op 11 September 1993 het ds. J.J.J. Erasmus ’n gedenksteen onthul met die oog op die gemeente se 100ste bestaansjaar.

1. Rumpff, Derk, 1910 – 1913 (in kombinasie met Standerton)
2. Du Toit, dr. Stephanus, 1930–1936
3. Van der Walt, N.H., 1936 – 1947 (in kombinasie met Heidelberg)
4. Du Plessis, dr. Sarel Jacobus, 1947 – 1952 (in kombinasie met Heidelberg)
5. Venter, Willem, 1953 – 1956 (in kombinasie met Standerton)
6. Van der Vinne, Jacob Albert Hendrik, 1957 – 1960
7. Taljaard, Daniël Johannes, 1960 – 1963 (verlaat die bediening)
8. Van der Walt, dr. Andries Gustaaf Petrus, 1965 – 1968
9. Klopper, Andries Hendrik, 1969 – 1975
10. Roos, Gerhardus Jacobus van Staden, 1975 – 1992 (aanvaar sy emeritaat)
11. Erasmus, Jacobus Johannes Jurgens, 1992 – 2001 (in kombinasie met Vrede); 2008 – hede
12. De Jager, Andries Petrus, 2003 – 2007

• Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.