Beervleidam
| Beervleidam | |
|---|---|
 Beervleidam vanaf N9
| |
| Amptelike naam | Beervleidam |
| Ligging | Aberdeen, Oos-Kaap |
| Provinsie/Land | Suid-Afrika. |
| Koördinate | 33°4′30″S 23°29′1″O / 33.07500°S 23.48361°O |
| Dam in | Grootrivier |
| Doel | Besproeiing |
| Openingsdatum | 1957 |
| Eienaar | Departement van Waterwese |
| Soort dam | Grondvulling |
| Hoogte van wal | 31 m |
| Lengte van wal | 348 m |
| Bakmaat | 85,8 miljoen m3 |
| Reservoir | Beervleidam Reservoir |
| Opvanggebied | 2 071 990 ha |
| Damoppervlak | 231 ha |
Die Beervleidam is in die Oos-Kaap, Suid-Afrika. Dit is geleë waar die Kariega- en Soutriviere saamvloei, net langs die N9 tussen Willowmore en Aberdeen in die Oos-Kaap. Die rivier staan hiervandaan bekend as die Grootrivier.[1]
Konstruksie is in 1953 begin en die dam is in 1957 voltooi en amptelik in gebruik gestel. Dit het 'n opvanggebied van 2 071 990 ha, 'n kapasiteit van 85 800 000 m3 en 'n oppervlakarea van 23 vierkante kilometer. Die damwal is 31 m hoog en 348 m lank.[2]
Die doel van die dam is eerstens om die vloedwaters van die Grootrivier te tem en daarna eers om water te verskaf vir vloedbesproeiing (in teenstelling met permanente besproeiing). Beervleipoort net bokant Willowmore by die samevloeiing van die Sout- en Kariegariviere is 'n nou poort waar groot hoeveelhede water met 'n redelike kort wal vasgekeer kan word omdat die water oor die Karoovlaktes agter die bergreeks opstoot.
Die Soutrivier is geneig om sout te word en verdamping oor die groot oppervlakte werk mee dat die soute kondenseer. Daarom is die opgegaarde water nie geskik vir besproeiing nie. Reën kom in die vorm van donderstorms en is uiters wisselvallig. Dit veroorsaak verspoelings en die water dra dan baie slik wat die dam se opgaarvermoë verminder. Na geweldige reën in die Karoo in 1961 het die dam vir die eerste maal oorgeloop. Toe het hy hom bewys as vloedbeheerdam en so skade voorkom in die Gamtoosriviervallei.[3]
Sien ook
[wysig | wysig bron]Verwysings
[wysig | wysig bron]- ↑ Padlangs deur Suid-Afrika. 2010 ISBN 978-1-77007-751-5
- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ Malan, G.F.: Die brullende leeu getem. Patensie, 1970