Wologda-oblast

Wologda-oblast Вологодская область
Die ligging van Wologda-oblast in Rusland.
Politieke status
Land	Russiese Federasie
Federale distrik	Noordwestelike
Ekonomiese streek	Noordwestelike
Stigting	1937
Regering
Hoofstad	Wologda
Leier	Oleg Koefsjinnikof
Amp	Goewerneur
Wetgewer	Wetgewende Raad
Bevolking
Sensus	2010
Totaal	1 202 444
Volgorde	42ste
Digtheid	8,25/km2
Stedelik	70,7%
Plattelands	29,3%
Statistiek
Oppervlakte	145 700 km2
Volgorde	25ste
Tydsone	UTC+04:00
Registrasienommer	35
Amptelike tale	Russies
Webtuiste	http://www.vologda-oblast.ru/
Wapen en vlag
Portaal    Rusland

Wologda-oblast (Russies: Волого́дская область, Wologodskaja oblast) is ’n deelgebied van Rusland. Dit lê in die Noordwestelike Federale Distrik en die hoofstad is Wologda.

Die oblast het volgens die Russiese sensus van 2010^[1] ’n inwonertal van 1 202 444. Die grootste stad is Tsjerepowjets, die tuiste van die Sewerstal-metalurgieaanleg, die grootste nywerheidsonderneming in die oblast.

Daar is talle historiese monumente, soos die Kirillo-Belozersk-klooster, Ferapontof-klooster (’n wêrelderfenisterrein) met fresko's van die beroemde ikoonskilder Dionisius, die middeleeuse dorpe Weliki Oestjoeg en Belozersk asook barokkerke.

Die gebied van Wologda-oblast word sedert die voorgeskiedenis deur Fins-Oegriese volke bewoon. Die Wepse, wat nog in die weste van die oblast woon, is afstammelinge van hulle. Die meeste plekname in die streek is ook Fins-Oegries. Daarna het Russe die gebied betrek. Belozersk is in 862 in kronieke genoem as een van die oudste dorpe in Rusland. Die grootste deel van die gebied is deur die Republiek Nowgorod beheer. Weliki Oestjoeg en die weste van die hedendaagse oblast was deel van die Prinsdom Wladimir-Soezdal en is voortdurend deur Nowgorod bedreig.

In die 13de eeu het baie klein prinsdomme hier floreer. Tussen 1452 en 1481 was Wologda ’n sentrum van die Prinsdom Wologda, die laaste onafhanklike prinsdom in die gebied. Teen die einde van die 15de eeu was die hele grondgebied deel van Moskowië.

In die 14de en 15de eeu het monnike na die gebied gekom omdat hulle afsondering gesoek het, maar steeds kontak met die prinse van Moskou wou behou. Die prinse het die kloosters weer beskou as ’n manier om Moskowië se invloed in afgeleë gebiede te laat geld. ’n Paar invloedryke kloosters, soos Kirillo-Belozerski en Ferapontof, is gestig. Eersgenoemde het gou een van die prominentse Russiese kloosters geword, en dit het groot politieke invloed en ’n goeie ekonomie gehad.

In die middel van die 15de eeu was die gebied betrokke by die Moskouse Burgeroorlog en Wasili die Blinde is in 1446 na Wologda verban. Tydens die Tyd van Beroeringe is die gebied geplunder deur Poolse troepe, wat in ’n stadium probeer het om Wologda te verower, maar dit nie kon regkry nie.

In die 17de eeu was Wologda ’n vooruitstrewende stad aan die hoofhandelsroete tussen Moskou en Wes-Europa. Tydens die bewind van Pieter die Grote in die 18de eeu het Wologda ’n skeepsbousentrum geword en ’n groot ondersteunende rol gespeel in Russiese militêre operasies teen Swede. Wologda se belangrikheid as ’n handelstad het egter afgeneem nadat Sint Petersburg in 1703 gestig en die buitelandse handel na die Oossee herlei is. Pieter het selfs beperkings geplaas op die Witseehandel.

In 1708 het Pieter die Grote ’n edik uitgevaardig vir die stigting van sewe goewernate.^[2][3] Wologda het deel van die Archangelgorod-goewernaat geword en die westelike deel van die oblast het in die Nowgorod-goewernaat geval. Later is die Wologda-onderkoninskap, Wologda-goewernaat en eindelik in 1937 die Wologda-oblast gestig.

Op 4 Julie 1997 het Wologda, saam met Brjansk, Tsjeljabinsk, Magadan en Saratof, ’n magverdelingsooreenkoms met die federale regering onderteken waarvolgens hulle outonomie gekry het.^[4] Dié ooreenkoms is op 15 Maart 2002 afgeskaf.^[5]

Die Wologda-oblast het in 2010 altesaam 1 202 444 inwoners gehad.^[1] Van hulle is 97,3% Russe, 0,7% Oekraïners, 0,3% Belarusse en 0,04% Wepse.

• Wikimedia Commons het meer media in die kategorie Wologda-oblast.

• Hierdie artikel is in sy geheel of gedeeltelik uit die Engelse Wikipedia vertaal.

60°05′N 40°27′O / 60.083°N 40.450°O / 60.083; 40.450