Hasan di Tiro

Hasan di Tiro
Lahé	3 Buleuën Peuët 1964 Tiro, Pidie, Acèh
Abéh umu	3 Juni 2010 Banda Acèh
Agama	Islam
Peurumoh/lakoe	Dora H. Tiro

Teungku Hasan Muhammad di Tiro lahé di Pidie, Acèh 25 uroë buleuën 9 thôn 1925. Meuninggai di Banda Acèh bak 2 uroë buleuën 6 thôn 2010. Gobnyan nakeuh sidroe cuco nibak keuturônan ulama Tiro nyang lam seujarah Prang Acèh geulawan Beulanda dilèe kon neumat pucôk pimpénan Mujahidin Acèh. Lam riwayat hudép Tengku Hasan Muhammad di Tiro ka geupeudong saboh geurakan peulawanan di Acèh nyang meutujuan keuneuk peumeurdéka Acèh dari neugara IndônèsiaSipanyang hudép gobnyan cit hana that kayém na di Acèh, leubèh le neucok masa hudép di luwa nanggroë. Mulai phôn neujak sikula u Jogjakarta lam masa peujuangan Indônèsia sampoë bak thôn 1950 Hasan Tiro muda neucok saboh beasiswa Colombo Plan keugeujak meurunoë u Amirika Carékat bak thôn 1950. Di Amerika gobnyan geumeurunoë èleumèe hukôm bak Universitas Columbia^[1].

Hasan Muhammad di Tiro ubeut neu jak sikula di Sigli. Ngon peungalaman masa ubeut nyang that jeuet keu peunuman sidroe Hasan di Tiro, nakeuh sikap ureuëng Acèh yôh nyan. Gobnyan geutawôk lé ureuëng deungon nan nyang that mulia bagi bansa Acèh, Tengku. Seubagoë sidroë turônan ulama Tiro nyang le that syahid lam Prang Acèh nakeuh meuneuhôi lagèe nyan cit ka biasa. Bak sikula di Sigli nyan Hasan Tiro muda le geuteumè meurunoë bhaih nasionalisme bak gurèe neuh, HM Nur El-Ibrahimi. Nyankeuh seubab bak watè ramèe ureuëng-ureuëng peunténg Acèh neudukông Indônèsia meurdéka bak thôn 1945 gobnyan laju geutamong lam Barisan Pemuda Indonesia di gampông neuh. Lheuëh nibak nyan bak 24 uroë buleuën 9 thôn 1945, keuluarga rayeuek Tiro, ngon ayah cut gobnyan, Tengku Umar Tiro geu akô meuseutia keu neugara Indônèsia^[2].

Lheuëh seuleusoë nibak sikula meuyub ngon teuneungoh di Pidie Hasan di Tiro muda neujak sikula manyang u Jogjakarta bak Universitas Islam Indônèsia (UII), gobnyan neucok jurusan Hukôm. Gobnyan leupah keu neujak sikula di Jogjakarta watèe nyan nakeuh ateuëh dukôngan Teungku Daud Beureueh ngon peudana meuntroë Indônèsia masa nyan Syafruddin Prawiranegara. Di universitas nyan Hasan di Tiro rôh jeuet keu sidroe ureuëng nyang peudong Pustaka UII meusaban ngon Kahar Muzakkar, ureuëng Sulawesi nyang dudoë geupeugrak DI/TII di Sulawesi Tunong thôn 1953-1962. Bak watèe rab seuleusoë kuliah gobnyan di UII nyan, na geupeugot saboh keunarang kitab nyang geupeunan "Perang Aceh 1873-1927" bak saboh alinea lam kitab nyan neupeugah nyang bahwa nakeuh Acèh nyoe nakeuh saboh nangroë nyang hanjeuet meucré ngon Indônèsia^[3].

Thôn 1949 Hasan di Tiro meuhasè peutamat sikula bak UII, lheueh nyan gobnyan laju geuwoë u Acèh. Trôh u Acèh gobnyan neukeurija bak diwan Pemerintahan Darurat Rèpublik Indônèsia (PDRI) di meuyub peudana meuntroë Syarifuddin Prawiranegara. Watèe nyan nang peumeurèntahan Indônèsia geupinah u Acèh, meuingat Jogjakarta ka rhôt lam jaroë Beulanda bak agresi keuduwa^[4].

Lheuëh masa sikula di Jogjakarta, ngon Indônèsia pih ka piyôh nibak prang peutheun meurdéka, Hasan di Tiro nyang masa nyan umu 25 thôn neujak sambông sikula u Amèrika. Sira geukuliah di Columbia University neukeurija sikhan watèe bak konsulat Indônèsia di New York. Thôn 1953 nakeuh thôn nyang jeuët keu peuneuntèe riwayat hudép Hasan di Tiro, di acèh bicah prang barô antara teuntra DI/TII nyang geupimpén lé Teungku Daud Beureueh. Lam saboh keujadian di Acèh nyang geuthèe nan ngon Keujadian Pulôt Cot Jeumpa Hasan di Tiro yang yôh nyan neukeurija bak konsulat Indônèsia neupeunyata meulawan ngon peumeurèntah di Jakarta. Lam keujadian di Cot Jeumpa lé Hasan di Tiro dari New York kalheuëh neu peuingat peumeurèntah Jakarta ngon geukirém surat keu peudana meuntroë Indônèsia Ali Sastroamidjojo nyang neuyuë peupiyôh prang meuseunjata lawan Acèh^[5].

Ban neukalon meunan ka lé Jakarta laju neupeubateuë pasport Hasan di Tiro, akibat nyan bak uroë 27 buleuën 9 thôn 1954 Hasan di Tiro ka jitheun lé Jawatan Imigrasi New York. Meunan pih deungon na jaminan padum-padum droë senator, Hasan di Tiro dudoë jiteurimong jeuet keu ureuëng neuduëk teutap di Amerika Syarikat^[6].

Bak uroë 4 buleuën 9 thôn 1976 Hasan di Tiro geutinggai banda New York. Gobnyan geuwoë u Acèh keu saboh meukeusud geumeujak puga peujuangan barô di Acèh. Pah bak uroë 30 buleuën 10 thôn 1976 Hasan di Tiro meuhasè geujeumeurang Seulat Malaka keu geutamong u Acèh ngon kapai ubeut di Pasi Lhôk, Keumang Tanjông Pidië^[7]. Ngon padum-padum droe sahbat nyang ka geuprèh di pasi nyan, Hasan di Tiro neupeuphôn langkah barô bak riwayat peulawanan gobnyan keu peumeurèntah Jakarta. Dari Pasi Lhôk geujak ngon geukawai lé padum-padum droë ureuëng keudéh lam glé di ateuëh Panté Raja. Lam glé nyan keuh neupeusaho geuneurasi phôn Geurakan Acèh Meurdèka. Na si buleuën geupeugot markaz di glé Panté Raja, teuma dudoë geuminah keudéh u Bukét Halimon di da'irah Tiro ngon Keumala. Glé di Halimon nyan nakeuh teumpat nyang that meuseujarah bagi keuluwarga Di Tiro, di glé nyan Teungku Ma'ad Tiro syahid keunong aneuk beudé peunjajah bak uroë 3 buleuën 12 thôn 1911^[8]

1. ^ "url:http://www.hasantiro.com". Diarsipkan dari versi asli tanggal 2016-03-05. Diakses tanggal 2013-06-01.  Hapus pranala luar di parameter |title= (bantuan)
2. ^ "Berakhirnya Sebuah Catatan Harian, (teunuleh Yarmen Dinamika bak serambinews.com, geucok lé komisikepolisianindonesia.com) akses 02-06-2013". Diarsipkan dari versi asli tanggal 2013-06-09. Diakses tanggal 2013-06-01. 
3. ^ http://www.andreasharsono.net/2006_03_01_archive.html
4. ^ "Idem, akses 02-06-2013". Diarsipkan dari versi asli tanggal 2013-06-09. Diakses tanggal 2013-06-01. 
5. ^ "Archive copy". Diarsipkan dari versi asli tanggal 2013-05-29. Diakses tanggal 2013-06-01. 
6. ^ http://www.acehtraffic.com/2013/03/hasan-tiro-dan-bendera-bulan-bintang.html
7. ^ http://kc.monevacehnias.bappenas.go.id/dc/articles/19811210_Price_Freedom_Unfinished_Diary_Tengku_Hasan_Di_Tiro.pdf^{[hubông luwa maté]}
8. ^ http://www.islamicmanuscripts.info/preprints/Syarwan-2009-TEUNGKU%20CHIK%20DI%20TIRO%20-%20HPS-tobe%20sent.pdf