Meudeuhab Syafi'i

Imeum Syafi'iy atawa Syafi'i (bahsa Arab: الشافعية‎) nyan keuh nan salah sidröe ulama meudeuhab, nan leungkap gopnyan nakeuh Muhammad bin Idris Asy-Syafi'iy, geulakap deungön Abu Abdillah. Imeum Syafi'iy lahé bak thòn 150 Hijriah di Gaza röt tunöng Palestina. Na chit ahli seujarah nyang peugah göpnyan lahé di Asqalan, tapi nyoe han jeuët keu peukara kareuna Gaza jameun rôh awai-awai tamöng wilayah Asqalan. Rôh mantöng ubeut-ubeut ureuëng chik agam göpnyan ka meuninggai dônya. Umu tujôh thôn ka jeuët geuhafai Al-Qur'an man lhèe plôh juz, bak umu siplôh thôn ka jeuët geuhafai kitab Al-Muwattha', saboh kitab Hadih nyang geususôn lé Imeum Malék.

Imeum Syafi'iy geupeunan lagèe nyan seubab na hubôngan silsilah ngon Syafi' bin Sa-ib, salah sidröe sahabat Nabi Muhammad SAW nyang meuiman keu Nabi, na ikôt Nabi lam prang Badar. Meunyo taparéksa silsilah leungkapjih nakeuh:

Muhammad bin Idris bin Abbas bin Usman Ibnu Syafi' bin Sa-ib bin Ubaid bin Abdi Yazid bin Hasyém bin Abdul Muthallib bin Abdi Manaf.

Meusapat silsilah Imeum Syafi'iy ngön silsalah Nabi Muhammad SAW bak Abdu Manaf, kareuna silsilah Nabi nakeuh Muhammad bin Abdullah bin Abdul Mutthalib bin Hasyém bin Abdi Manaf. Lam silsilah nyöe manduwa jih na Hasyém, Hasyém nyang na bak silsilah Nabi nyan saudara agam ayah (apa atawa abuwa) Hasyém nyang na bak silsilah Imeum Syafi'iy.

Meunyo meunan Imeum Syafi'iy nyoë rôh lam keuturunan Arab Quraisy, lam masalah nyoë na saböh hadih meusyeuhu, nyang geuhubông hadih nyan keu Imeum Syafi'iy. Hadih nyan nakeuh:

عالم قريش يملأ طبآق الأرض علما لأن الكثرة و الإنتشار في جميع الأقطار لم يحصلا في عالم قريش مثله

"Sidröe ureuëng além Quréh (Quraiysy) nyang èleumèe ureuëng nyan peunoh bak mandum lapésan bumöe kareuna le èleumèe ngön meuchuhu man saboh nyan nyang hana hasé duwa nyan bak ureuëng além Quréh la'én."

Meunan nyang meutuléh lam kitab I'anah Ath-Thalibin, juz phôn bak ôn keu limong blaih sampoe nam blaih.

1. K.H. Sirajuddin Abbas. Sejarah Keagungan Mazhab Syafi'i, Ôn keu sikeureuëng blah. Pustaka Tarbiah. Jakarta 2003.
2. Abu Bakar Muhammad Syatha Damyathiy. اعانة الطالبين - I'anatuththalibin. Juzu' phôn. Ôn keu limong blah sampoe keu namblah. CV. Karya Insan Indonesia. (-hana thôn)