香港裔英國人

港裔英國人
李康敏 梁佩詩 盧曼華 陳智燊
總人口
96,455 （2001年，喺香港出世） 約123,411 (2021 調查報告，包括蘇格蘭) 部份經 BNO Visa 移民英國
語言
主要使用英式英文、港式廣東話
宗教信仰
基督新教、天主教、佛教、道教
相關種族
香港裔美國人、華裔英國人

港裔英國人又稱為英籍香港人、居英港人等，係指 1) 祖籍喺香港嘅英國人 2) 父母或自己同時擁有英國國籍同埋香港居留權嘅人 3) 英屬香港期間移居香港嘅英國人嘅後代。

雖然佢地通常被認為係華裔英國人嘅一個群體，但係好多都唔鍾意呢種叫法，因為唔想令其他人覺得佢地親中共。港裔英國人唔少都持有英國國民（海外）護照（通稱為 BNO 護照）^[1] 。

由於香港係英國嘅前殖民地，所以一向都係香港人最受歡迎嘅移民地點之一^[2]。由於英文至今喺港英兩地都有官方地位^[3]，所以令雙方溝通都比較方便，適應亦比較容易。

喺二次大戰後，英國通過咗1948年英國國籍法令（英文：British Nationality Act 1948），容許咗喺香港出世嘅人無阻地移居英國。喺殖民地時代期間，唔少英國或者大英帝國其他地方嘅人移居嚟香港，所以到97回歸時有唔同血統而喺香港出世嘅香港人^[4]。

到2020年7月，香港國安法正式實施，英國隨即為 BNO 護照持有者提供成為英國公民嘅途徑^[5]。截至2022年底，共有 153,708 份被允許嘅 BNO 簽證^[6]。

六七暴動引致香港社會動盪不安，一啲比較富裕嘅香港居民對香港前景憂慮，選擇移居外地，當中唔少係新界原居民。

六四事件後，唔少香港人對主權移交缺乏信心，英國政府因為道義責任，推出居英權計劃，俾5萬個家庭得到英國護照，部分人士選擇定居英國。除咗英國以外，美國、加拿大、澳洲、紐西蘭都係當時熱門嘅移民地點。

自國安法實施以來，香港嘅言論同集會自由日漸縮窄，香港政府大舉向異見人士秋後算帳，社會彌漫住白色恐怖^[5]。英國政府俾 BNO 護照持有人喺英國居住、讀書或者做嘢，5年之後可以申請無限期居留，再住多12個月之後可以登記成為英國公民^[7][8]。因此，數以萬計嘅香港人攜同幼小孩童去移民他鄉^[9]。