赤柱（英文：Stanley）係香港一個地方，亦係一個村，喺香港島南岸，赤柱半島上面，屬於南區。佢喺淺水灣東面、石澳西面。赤柱係旅遊名勝，以墟市同沙灘最為吸引人，之後美利樓都喺度重建。赤柱係個古村，最遲明朝萬曆年間已經有人住，亦曾經有唔少水上人聚居，船影處處，不過今日已經見唔到漁船。英國人初時曾經想以赤柱爲都，不過最後都係去咗裙帶路，卽係而家嘅中環。
