武田信玄

武田信玄（1521年 12月1號—1573年 5月13號、大永元年十一月初三—元龜4年四月十二、拚音：たけだ　しんげん、羅馬字：Takeda Shingen）係日本戰國時代甲斐國嘅大名。佢阿爸係武田信虎，阿媽係大井信達嘅女大井之方。佢細個嗰陣嘅名係太郎，元服之後改名為晴信，後來改名為信玄。由於佢無論喺軍事或政治上都有出色嘅判斷，後世稱佢為甲斐之虎。

少年時期

佢係甲斐國出世，幼名太郎，當佢進行元服後，改名為晴信，不過佢嘅阿爸信虎唔重視佢，佢比較睇實信玄的細路武田信繁，激發佢對父親嘅不滿。終於喺1541年佢終於同家老板垣信方同埋甘利虎泰推翻阿爸，信虎被迫出走到駿河國嘅今川家，佢要係嗰度過啲隱居嘅生活。據講嘅理由係佢實行暴政，受唔到人民歡迎。

信濃攻略

喺將信虎趕出甲州後，後玄開始調整佢嘅軍事計劃，佢率先利用高遠賴繼，迫佢叛變，然後聯手將諏訪氏消滅，其後將附近嘅小勢力相繼消滅，不過喺面對猛將村上義清下，曾令信玄輸過兩次，令信玄損失不少大將，好在真田幸隆決意幫信玄之下，利用計仔奪得砥石城，取得優勢。終於1553年迫到義清放棄葛尾城，以後要靠長尾景虎嘅力量反抗信玄。

川中島合戰

自從村上義清向長尾景虎（後來嘅上杉謙信）要求幫手，根據甲陽軍鑑記載，長尾（上杉）同武田軍在川中島交過五次手，當中以第四次川中島之戰最為出名，兩軍總大將喺呢場戰爭見過面，而且仲短兵相接，但自從上杉軍喺第五次川中島之戰後，由於要應付內亂，所以冇再入侵武田的領地。

信玄嘅晚年

信玄改攻上野國嘅箕輪城，之後守將長野業正曾六次打低信玄嘅軍隊。不過1561年業正死咗，由佢個仔長野業盛繼承，1566年終於攻陷箕輪城。其後信玄因應今川氏真嘅支援，到達駿府城，但係因為德川同北條聯軍軍力龐大，最終令信玄撤退。冇耐，武田、今川同北條三國之間同盟瓦解，令到信玄有理由進攻駿府，先搞掂今川氏真後，再同時對北條進攻，軍隊曾經一度包圍小田原城，不過信玄取消包圍，喺三増峠大勝北條軍，不過佢察覺德川家康有意東征，喺攻略北條唔成後，加上喺北條氏康死後，決意與北條同盟，決定向西進攻，佢嘅目的係上洛，加上佢同足利義昭等勢力形成咗信長包圍網，而且義昭不斷催促下，決定派遣大量兵馬出征，1572年12月，喺三方原大敗德川軍，史稱三方原之戰，但係佢喺第二年因為病發嘅關係，軍部向西返回，最終佢喺信濃國伊那郡國館途中病死，死因係肺癆。死後由勝賴繼承家督。