慰安婦

慰安婦係指日本軍喺第二次世界大戰嗰陣徵召，為日本軍人提供性服務嘅女人^[1]，當中有好多係俾人強迫或者誘騙而淪為性奴隸^[2][3][4]。日本著名詞典《廣辭苑》對「慰安婦」一詞嘅解釋係「隨軍到戰地部隊慰問官兵嘅女人」，但係大多數歷史學者將慰安婦定義為「被迫充當日軍性奴隸嘅婦女」^[5][6]。呢啲女性主要來自日本本土、殖民地、中國，亦都有東南亞同荷蘭女性。

1931年11月，日本海軍將日本僑民響上海經營嘅4間風俗場所指定為慰安所，從此慰安婦嘅制度蔓延到日本喺東亞嘅成個戰場^[7][8]。二戰末期，美軍同聯合國盟軍進入亞太戰場之後，日本同韓國為咗防止美軍騷擾當地嘅婦女，曾經針對美軍招募慰安婦同設立慰安所^[9][10][11]。

據當時日軍官方嘅說明，提出慰安婦制度係為咗減少因為性侵犯而帶來嘅性病問題^[12]，並撫慰日軍因為戰敗而產生嘅沮喪情緒^[13]。

1931年11月，日本海軍將日本僑民喺上海虹口經營嘅4間風俗場所指定為日本海軍特別「慰安所」^[7][8]，其中「大一沙龍」係世界上第一間日軍慰安所，亦都係存在時間最長嘅慰安所^[14][12]，其它三間係「小松亭」、「永樂館」同「三好館」^[15]。1932年1月中國嘅上海事變以後，日軍性侵中國婦女嘅事不斷發生，又開始響上海組建「慰安婦團」^[16]。

1937年12月，日軍進佔南京之後不斷有性侵案，造成中國人更加強烈嘅抗日意識，國際輿論亦都譴責日本；因為噉，日本開始響中國廣泛推廣上海嘅模式，標誌住慰安婦制度嘅正式形成^[16][13]。

2007年3月，韓國釜山外國語大學教授金文吉公開日本駐中國上海領事館警察田島周萍喺1937年12月發俾長崎水上警察署嘅公文《有關為皇軍官兵徵調慰安婦嘅委託文件》，記錄當時日本為咗廣泛動員慰安婦，領事館、憲兵隊、陸軍武官室等等嘅單位分工縝密：日本領事館簽發營業執照俾慰安所，憲兵隊負責將慰安婦運去慰安所同保障慰安所嘅安全，陸軍武官室負責起慰安所同檢診慰安婦^[17]。

喺呢個制度之下，東亞有幾十萬婦女俾日軍徵召為軍妓。朝鮮中央通訊社主張朝鮮人慰安婦有14萬人^[18]，上海師範大學教授蘇智良主張有二十萬中國婦女淪為慰安婦，但係兩者都無數據來源。婦女救援基金會主張台灣嘅慰安婦至少有1200人^[19][20]。作為美軍嘅慰安婦嘅日本女人有五萬五千人^[11]。有尐史學家認為曾經淪為慰安婦嘅各國婦女有40萬以上^[21]。

證據顯示，有好多慰安婦惹到性病，重有尐因為多次墮胎而不孕。慰安婦有時重要充當護士、工人甚至係士兵，極個別情況之下，為咗掩蓋罪證，佢哋重會被集體槍殺^[21]。有調查顯示，慰安婦只可以攞40%賣淫所賺嘅錢，60%要交俾軍方^[22]。中國喺文革時期，倖存嘅慰安婦往往會受到社會嘅歧視同迫害，但係呢種現象響今日嘅中國社會已經唔存在^[23][24][25]。

前日軍軍人吉田清治1977年寫咗《朝鮮慰安婦同日本人》^[26]，1983年寫咗《我嘅戰爭犯罪》^[27]，話係上級命令喺朝鮮強徵慰安婦，引發大眾對慰安婦嘅爭論，之後佢又多次喺法庭上作證^[28]同對外國媒體作證^[29][30]。聯合國人權委員會喺1996年1月嘅慰安婦調查報告引用咗吉田嘅書^[31]；2007年美國眾議院嘅慰安婦報告通過2006年嘅調查報告，間接噉將吉田嘅書當成來源^[32]。

之不過，當學者許榮善同秦郁彥查出部份內容係作出嚟之後，吉田承認咗呢點^[33][34]。濟州島出身嘅史學家金奉玉經過長期查證，證明吉田講嘅綁架事例係作出嚟嘅，又認為呢本書「係一個淺薄嘅日本人發錢寒」^[35][36]。

從2014年4月尾開始，吉林省檔案館公布新發掘嘅證據，顯示日本喺第二次世界大戰期間曾經通過各種方式強徵慰安婦^[37]，又發現關於日軍以公共財政嘅方式採購「慰安婦」嘅檔案^[38]。

美國^[39][40]、荷蘭^[41]、加拿大^[42][43]、中華民國、菲律賓、中華人民共和國^[44]等等嘅國家都曾經批評日本強徵慰安婦。

學者秦郁彥話慰安婦有一半日本人、一半朝鮮人，但係介紹人百分百都係朝鮮人^[45]。1944年，美軍情報心理戰部門嘅報告指出，喺緬甸慰安所嘅朝鮮女人還完債就返去朝鮮，另外慰安婦有個人房間，有拒絕接客嘅自由，每星期有一日休息，生活充裕^[46][47]。

據日本研究者查得1944年朝鮮《京城日報》7月2刊登嘅慰安婦廣告，慰安婦嘅工資有300日元，而且所登嘅聯繫人名係朝鮮式姓名，因此質疑強徵嘅講法^[48]。前東京都知事石原慎太郎曾經話慰安婦係自願賣身賺錢。^[49]