彌撒曲

彌撒曲（英文：service music），喺天主教，係指喺彌撒同其他禮儀入面用嘅禮儀經文，配咗音樂之後而成嘅歌。爾啲禮儀經文包括例如垂憐頌、光榮頌、天主經等等，或者例如亞肋路亞、亞孟等等嘅短句。同一般聖詩唔同嘅係佢哋嘅字係禮儀嘅一部分，就算唔唱出來都要講出來。

作彌撒曲好多時會作成套（英文：mass setting^[1]），等啲音樂有一致嘅感覺，但係中文嘅彌撒曲就算作嘅時候有成套作，用嘅時候好多時都係溝亂用。喺而今嘅西方，真係喺彌撒用嘅成套嘅彌撒曲順序包括垂憐頌（拉丁文：Kyrie）、光榮頌（Gloria）、聖聖聖（Sanctus）、信德的奧蹟（英文：Memorial Acclamation）、亞孟同羔羊頌（拉丁文：Agnus Dei）^[1]。

古典音樂都有彌撒曲（英文：mass）爾種音樂形式，就係指成套嘅爾種，例如莫扎特嘅 K.427 同巴哈嘅 B小調彌撒曲；古典音樂嘅彌撒曲都係跟彌撒曲嘅格式，理論上可以喺彌撒用，但係實際上係幾乎唔會，因為古典音樂嘅彌撒曲啲話會聽唔明，唔乎合梵蒂岡第二次大公會議｢積極參與禮儀｣嘅原則^[2]。