嗎哪
嗎哪（希伯來文：מן，羅馬拼音：man；英文：manna），天主教譯瑪納[1]，係根據《聖經》記載，係古代以色列人出埃及嘅時候，喺四十年嘅曠野生活裏面，上帝每日從天而降畀佢哋作為食糧嘅嘢食。
聖經記載
[編輯]根據《出埃及記》第16章記載，嗎哪出現喺以色列人出埃及之後第二個月嘅15日，當時摩西帶領以色列人到達以琳同西乃中間、汛嘅曠野，以色列人向摩西同亞倫埋怨話：「呢度冇嘢食，想我哋都喺呢度餓死！」上帝於是答應摩西將要賜嘢食畀以色列人。喺嗰晚，上帝開始降嗎哪畀佢哋食，挨晚又有鵪鶉飛嚟，由嗰一日開始，以色列喺呢四十年每日都係以嗎哪作為糧食，一路冇停過。嗎哪喺夜晚隨住露水降喺營度，形狀好似白霜嘅小圓形物體，以色列人叫呢啲嘢做「嗎哪」（希伯來文，意思即係「咩嚟㗎？」）。形狀好似芫荽子，又好似珍珠，係白色嘅，味道好似用蜜糖整嘅餅。每日朝早，以色列人將嗎哪執起，直接食，或者用研磨整碎，喺鍋度煮，又整成餅，滋味好似新油。嗎哪只可以保存一日，如果留到第二日就會生蟲發臭，但喺安息日會暫停降嗎哪一日，所以喺每個禮拜嘅第六日嗎哪會降雙倍分量，同可以保存兩日，第二日都唔會變壞[1]。直到約書亞帶領百姓過咗約旦河，進入迦南地，並且食迦南地嘅出產之後，先至停降嗎哪[2]。