Imswinne

Imswinne (/imswɛ̃n/)^[1] (e-n amazir, ⵉⵎⵙⵡⴰⵏ, imswan ^{aschoûtez lu}, ralfbetijhî e francès Imessouane, Imsouane, Imswane), c' est on viyaedje di plaijhance al mer, so l' Oceyan Atlantike, e Marok, kinoxhou po les bounès wache po fé do surfigne.

• 
  scrît e-n alfabet tifinar
• 
  ralfabetijhaedje "Imsouane"
• 
  ralfabetijhaedje "Imswane"

Metowe so ene ponte, avou deus pladjes, ene a Bijhe, li pladje des cmeres, ene miete riskeuse. Li pladje di Nonne est metowe so ene baiye la k' les naivieus et ls surfeus s' polnut amuzer e såvrité.

Di l' ôte costé del baiye, n a l' ponte d' Igui n Tama, avou l' viyaedje do minme no.

Gn a deus voyes po-z î avni. Li prumire tot vnant d' Swira, a Bijhe, est foirt sitroete. Elle a stî basteye pa les Francès.^[2] On passe pås viyaedjes di Tikikerte et d' Tililte.

L' ôte, a Nonne, li prumire tot vnant d' Agadir, est pus novele, mins tolminme nén sins risse, copurade e l' esté, cwand gn a del convoye viè Imswinne.

• 
• 
  ponte d' Imswinne et belès waches
• 
  fraiti dins l' falijhe

Tourisse tote l' anêye, avou des surfeu d' tos les payis, assaetchî pal tcholeur di l' aiwe et l' doûceur di l' airaedje, et les belès waches.

Pitit pôrt di pexhe, rassonré pa l' etraidance djaponesse.

• 
  naçales et fåre
• 
  martchî ås pexhons
• 
  surfeu so s' plantche et naivieus

• Tagant Imswan (ⵜⴰⴳⴰⵏⵜ ⵏ ⵉⵎⵙⵡⴰⵏ), courtinnmint Tagant: prumî viyaedje sol hôteur, k' a dné l' no al sitåcion merrece. Si no vout dire «grand bwès»
• Tildi (ⵟⵉⵍⴹⵉ): viyaedje a Nonne, di l' ôte costé del baiye, målåjhey a-z avinde pa on long crawieus tidje di sacwant kilometes. Sol droet costé do tidje, gn a des falijhes ås trôs d' rotche avou des viyès ahoutes lomêyes «ⵜⴰⵃⵓⵏⴰ ⵉⵔⵓⵎⵉⵏ» (cahouteas des etrindjirs). C' est on ptit viyaedje di pladje, nén foirt peuplé.
• Igui n Tama (ⵉⴳⵉ ⵏ ⵜⴰⵎⴰ): viyaedje djusse sol cresse ådzeu del baiye, avou l' bastimint del marene.
• Asyinse (ⴰⵙⵢⴰⵙ) viyaedje ki va disk' a Isk Ousyinse (Iscousias, ⵉⵙⴽ ⵓⵙⵢⴰⵙ) li «coine» del montinne (pondant pegnon d' rotche). Gn a co èn ancyin tidje k' î moenne ki tournéve åtoû do mont et rivni so lu-minme. Li fotche si loméve rond pont d' Iscousyinse.^[3] Il egzistêye co mont l' voye a stî côpêye po mete l' aiwe a Tildi (diviè 2020).
• Agadir Imoucha (ⴰⴳⴰⴷⵉⵔ ⵉⵎⵓⵛⴰ): on simpe pitit viyaedje asteure avou on tchestea d' aiwe. Dins les tienes ki dischindèt sol mer, gn åreut des menes d' ôr dins l' tiene do tins des Portuguès.^[4] Si no n' a rén a vey avou les tchets (e-n amazir: mechch), mins c' est l' prononçaedje di Moussa (Moyisse) pås djwifs (adon: afoirci viyaedje Moyisse). Di l' ôte costé del voye, gn a Agadir Ayrud (ⴰⴳⴰⴷⵉⵔ ⵄⵢⵔⵓⴷ), ki vôreut dire «afoirci viyaedje do Ptit Åron».
• Troes hamteas veyåve d' Agadir Imoucha: Amtjan (ⴰⵎⵜⵊⴰⵏ), Id Louhrad (ⵉⴷ ⵍⵓⵀⵔⴰⴷ), Tamouchacht (ⵜⴰⵎⵓⵛⴰⵛⵜ).
• Assaca (ⴰⵙⴰⴽⴰ): c' est la k' gn a l' måjhon comene, on coledje ey ene grande moskêye.
• Afrad n Chater (ⴰⴼⵕⴰⴹ ⵏ ⵛⴰⵟⵕ) (vout dire, mot po mot: li rnetiaedje des avinés). Gn a come des basséns d' aiwe.
• Tillite (ⵜⵉⵍⵍⵉⵍⵜ) et Tikikerte (ⵜⵉⴽⵉⴽⵔⵜ): deus viyaedjes sol prumire voye vinant d' Essawira

1. ↑ Ralfabetijhaedje walon des nos marokins ki finixhèt pa -ane / -an, paski l' prononçaedje est pus près do son /n/ ki di /an/.
2. ↑ temognaedje del grand-mame d' èn otelî did la.
3. ↑ Guide bleu Hachette du Maroc, ed., 1978, p. ?.
4. ↑ Guide bleu Hachette du Maroc, ed., 1978, p. ?.