Borbouze (Graide)

Borbouze c' est l' no del pus viye måjhon del gåre di Graide, el province di Nameur (Beldjike). Cisse måjhon la esteut tote seule å mitan des bwès, li long d' ene viye voye et ci n' est ki dviè 1850, cwand on-z a-st avou l' trin, k' on a cmincî a båti des novelès måjhons ki fjhèt asteure li gåre di Graide. A ç' tins la, li dovreu del såle d' atinde ni criyeut nén co: "Graide", mins "Borbouze". Al guere di catwaze, li 23 d' awousse 1914, gn aveut yeu, a Bive, li viyaedje djondant, on combat inte les Françès et ls Almands. Gn aveut yeu 300-400 touwés. E 1917, les almands avént fé, a Borbouze, ene cimintire wice ki les sôdårds almands et francès ont stî eterés. E 1932, tos ces moirts la on stî rmetous dins l' grande cimintire di Maissin. I dmeure co so plaece, a Borbouze, ene colone almande ki datéve di 1917.

Après li batreye di Bive, les Francès si rtirént a Nonne. Onk di zels, k' aveut stî coixhî, a vnou a mori dins les bwès eter Bive et l' Moncea. Si comere lyi aveut fwait ene tombe la k' il a morou. Elle aveut fwait scrire dissu: Froide terre, tu caches à jamais celui que j'aimais. Li sôdård si loméve: Louis Augerau.

E 2004, des ovrîs almands ki vnént di Hepstedt (Brême), ene comene d' Urope come Bive, ont vnou rassonrer l' colone di 1917; on-z î a ramoenné ossu li tombe do Louis Augereau et tot ça ni fwait pus k' onk avou ene ôte tombe d' èn ôte sôdård francès Jules Mauny, ki vneu, lu, di St-Mathurin-sur-Loire. Ces sôdårds la fijhént pårteye do 135inme redjimint d' Infantreye. L' ôte redjimint ki s' a batou a Bive ere li 77inme.