KAJ

KAJ is e joungernbewegienge voe gasn die 12 of ouder zyn. KAJ (nie 't zeste lik KLJ (de boern), die mêestol va 16 begunn) bestoat in 80 lann, mor oek in West-Vloandern. KAJ stoat vo Kristelyke Arbeidersjoungern, mo is eignlyk gekender onder d' odde noame Katholyke Arbeidersjeugd.

KAJ is e joungernbewegienge die deur vriendschap, vormienge en actie joungern de meugelikeid gift voun te groein no bewustwordienge, verantwôordelikeid (ollêne en tope met aar jounge gastn) gericht up e moatschappy die democratisch en rechtveirdig is. De methode voun dat te doen, is "zien-ôordêeln-andeln".

Toet verre in de joarn 1900, moestn de mêeste jounge knechtn en misches gon werkn van 't moment dan ze 14 woarn (sommegte zest vroeger). Jozef Cardijn, e paster van de kantn van Brussel, wulde die gastjes oek etwot zinvuls loatn doen. Ezo is 'n begunn me de KAJ (toene nog Katholieke Arbeiders Jeugd, nu Kristelijke Arbeiders Jongeren) in de joarn 20. De bewegienge is officieel upericht in 't joar 1925.

Beisn 'n Twiddn Weireldôorloge beguste 'n KAJ oek met ofdêliengn up te richtn in werkkampn in Duutsland, 'n Ausland KAJ. 't Wos Eugène Coine, e kajotter uut Mêende, die doa vôorzitter van kwam. 't Wos verboodn voun tope te kommn, mo ze dein 't egliek in 'n duuk, kajotters verkendn makoar deur 't kajotterslied te schufeln. Achter 'n ôorloge kwam Eugène Coine oek nationoal vrygestelde.

In de joarn 50, up zyn hogtepunt, had de KAJ tusschn de 50 en 100 000 leedn (in Vloandern ollêne). In de joarn 60 begust het slichter te goan en zeker achter da Cardijn dôod gienk in 1967 (in 1965 wos 'n benoemd toet kardinoal (kardinoal van de arbeiders)) gienk het styf achteruut. In 1976 scheurde het zest in KAJ en Kajottersbewegieng (de verboundn Yper en Roeseloare in West-Vloandern) (de VKAJ wos oek apart), toet dan ze in 1995 were tope giengn.

Voen iedern regio werkt er e vrygestelde (beroepskracht). Z'en nundern bero in Roeseloare.

• Brugge-Tielt (oek wel Brult)
• Kortryk
• Roeseloare-Oostende (oek wel Mid West)
• Westoek (Yper-Veurn-Diksmude)

• -16
• +16
• -/+16
• +20 (je kut dus geweune lid bluuvn, oek a je ol 18 of mêer zyt).

• kernlid: in KAJ tracht de kern (e bitje lik leidienge in e jeugdbewegienge) tusschn de gasn te stoan, in te plekke van derboovn. 't Is oek de kern die zort voen aktiviteitn.
• kajotter: etwien die lid is van de KAJ, noemn ze ezô.
• regiokern: de vergoarienge die d'ofdêliengn ept en de regio doe droain.

• Officieeln Site

Ofbeeldiengn die ier by passn ku je vien in de categorie Young Christian Workers van Wikimedia Commons.