Pereir (lidn)

Pereir
Pereira

Lidnanznam	Flag
Valdkund	Kolumbii
Eläjiden lugu (2020)	477,027 ristitud
Pind	702 km²
Pämez'	Karlos Al'berto Maja Lopes (2020−2023, Carlos Alberto Maya López)
Telefonkod	+57−6
Aigvö	UTC−5

Pereir (isp.: Pereira [peˈɾejɾa]) om lidn Kolumbijan päivlaskmas. Se om Risaral'd-agjan (departmentan) administrativine keskuz i sen üks' 14 municipalitetaspäi, valdkundan kofen kazvatusen tahondan kaikiš suremb lidn.

Edel ispanijalaižiden tulendad tahond oli elänzoittud Kimbaja-kul'turan indejalaižil, hö sädiba tegesid kuldaspäi. Nügüdläižen eländpunktan aluz om pandud vn 1863 30. päiväl elokud. Lidn om nimitadud Francisko Pereira Martines-manpidajan (1783−1863) mödhe.

Pereir šingotase industrijal (alüminijasižed tegesed, motociklad), regionan logistikal i torguindal, kofen ümbriradmižel, lebuturizmal.

Lidn sijadase Andiden ezimägištol, 1411 m ü.m.t. keskmäižel korktusel, Otun-järven randal.

Municipalitet levigandeb 702 km² pindal, jagase 19 nimitadud lidnrajonaks i 12 külärajonaks. Sen klimatan järgenduz pindan mödhe: läm' 9,9 %, ven 60,7 %, vilu 11,5 %, al'pižen tundran (isp.: páramo) 17,7 %.

Klimat Matekanj-lendimportan rajonas (1346 m ü.m.t.) om tropine vihmmecoiden. Kun keskmäine lämuz om +21..+22 C°. Ekstremumad oma +10 C° i +37 C°. Paneb sadegid 2 424 mm vodes, vähemba vilukus-uhokus i heinkus-elokus (129..133 mm kus), enamba redukus-kül'mkus (288..290 mm kus).

Vl 2017 lidnan eläjiden lugu oli 474 335 ristitud. Läz 700 tuhad ristituid om ezilidnoidenke, Pereir sädab konurbacijad Doskebradas-lidnanke lähižen municipalitetan territorijal.

Kaikiš enamba levitadud religii om katolicizm. Om protestantizman pühäpertid mugažo.

Kaik om kümne universitetad vai niiden filialad ratas lidnas, niiden keskes oma Pereiran tehnologine universitet^[1] (isp.: Universidad Tecnológica de Pereira, radaškanzi vl 1961, 18,5 tuh. üläopenikoid vl 2018) i Pereiran katoline universitet.

1. ↑ Pereiran tehnologižen universitetan sait (utp.edu.co). (isp.)

• Lidnan oficialine sait (pereira.gov.co). (isp.)

Pereir (lidn) Vikiaitas