Larnak

Larnak
Λάρνακα (grek.)
Larnaka (turk.)

Valdkund	Kipr
Eläjiden lugu (2016)	59,200 ristitud
Pind	31,73 km²
Telefonkod	+357−24
Aigvö	tal'vel UTC+2, kezal UTC+3

Larnak (grek.: Λάρνακα [ˈlarnaka], turk.: Larnaka vai İskele, armen.: Լառնագա Larnaka) om lidn Kipran suvipäivnouzmaižel randal. Se om valdkundan koumanz' surtte lidn.

Ezmäižel voz'tuhal EME eländpunkt oli tetab kuti Kition-polis. Nügüdläine nimituz libub grekan kelen larnakes-sanaspäi «sarkofag» amuižiden kaumusiden suren lugumäran tagut lidnanno (enamba koumed tuhad).

Larnak šingotase meriportal i turizmal, rahvahidenkeskeine lendimport radab. Meri- i lendimportad oliba ližasaudud vn 1975 jäl'ghe, konz Famagustan meriport ozaižihe Pohjoižen Kipran kontrolin al i Nikosijan lendimport oli sauptud.

Lidn sijadase Keskmeren randal, 26 m ü.m.t. keskmäižel korktusel. Matkad Nikosii-pälidnhasai om 34 km lodeheze.

Klimat om Keskmeren pol'kuiv. Voden keskmäine lämuz om +19,6 C°, kezakus-sügüz'kus +25..+27 C°, tal'vkus-keväz'kus +12..+14 C°. Ekstremumad oma −1 C° i +41 C°. Paneb sadegid 351 mm vodes, niiden pol't tal'vkus-vilukus, kuiv sezon oleskeleb semendkus-sügüz'kus (20 mm pordos). Meriveden lämuz om +20..+26 C° semendkus-kül'mkus.

Vl 2011 lidnan eläjiden lugu oli 51 468 ristitud. Kaik 144 200 ristitud elädas ezilidnoidenke (2015).

Lidnas om hristanuskondan pühäpertid (ortodoksine hristanuskond, armenine jumalankodikund, riman katoline), islaman pühäpert' (kaikiš amuižemb sarel), vspäi 2005 judaizman pühäpert' om avaitud.

• Municipalitetan oficialine sait (larnaka.org.cy). (grek.)

Larnak Vikiaitas