Lübim

Lübim
Любим

Lidnanznam	Flag
Valdkund	Venäma
Eläjiden lugu (2021)	5,037 ristitud
Pind	11 km²
Pämez'	Pavel Lisicin (reduku 2023—, Павел Лисицин)
Telefonkod	+7−48 543-xx-xxx
Avtokod	76
Aigvö	UTC+3 (MSK+0)

Lübim (ven.: Люби́м) om Venäman lidn da lidnankund Jaroslavlin agjan pohjoižpäivnouzmas. Se om agjan kaikiš penemb lidn eläjiden lugun mödhe, Lübiman rajonan administrativine keskuz.

Eländpunktan aluz om pandud vl 1538 Ivan Grazijan käskön mödhe kaičemha tahondan eläjid totarlaižiden londoišpäi. Žilo sai makundan lidnan statusad vl 1777. Vspäi 1918 Lübim-raudtestancii radab lidnan suves «Danilov — Bui»-keskustal.

Lübim šingotase meckombinatal, sömtegimištol (leibänedheotand, saguden da argvoin tegim) i omblendcehal.

Lidn sijadase Obnoranjogen (132 km pitte, ven.: Обнора, Kostrom-jogen oigedpol'ne bassein) i sen oiktan Uč-ližajogen (87 km, ven.: Уча) ühthejoksmusen kaikil randoil, 105 m ü.m.t. keskmäižel korktusel.

Matkad Jaroslavlihesai om 94 km suvipäivlaskmha orhal, 109 km avtol vai raudtel. Lähembaine lidn om Danilov 36 km suvipäivlaskmha orhal, 51 km avtotedme vai 40 km raudtedme.

Kaik kaks' žilod i 15 küläd mülüdas lidnankundha Lübiman ližaks. Lidnankundan pind — 85,71 km².

Lidnankundan tobmuden pämez' om sen Administracijan pämez'. Edeline lidnan pämez' om Aleksandra Kozlova (sügüz'ku 2013 — reduku 2023). Lidnan Municipaližen nevondkundan ezimez' om Raisa Kovalevič.

Vn 2010 Venäman rahvahanlugemižen mödhe lidnan eläjiden lugu oli 5 555 ristitud, lidnankundan — 7 243 ristitud. Vn 2021 rahvahanlugemižen mödhe lidnan ristitišt oli 5 037 eläjad. Kaik 5 125 ristitud elihe lidnas i 6 372 ristitud kaikes lidnankundas (rajonan koume videndest) vl 2017. Kaikiš suremb lidnan ristitišt oli enamba seičemed tuhad eläjid vll 1939−1989 (7 722 rist. vl 1970).

Rahvahad (enamba 0,4 % vl 2021): venälaižed — 98,6 %, toižed rahvahad — 0,8 %, rahvahuden ozutandata — 0,6 %.

Ortodoksižen hristanuskondan nell' pühäpertid^[1] oma väges: koume jumalanpertid da časoun'. Niiden ližaks Jumalannägundan päjumalanpert' om udessündutamižes, völ kahten jumalanpertin i Ristan Zdviženjan päjumalanpertin jändused oma kaičenus.

Lapsiden opendusen aluzkundad oma severz'-se päivkodid, kaks' školad (keskškol i aluzškol), lapsiden sädamižen keskuz, muzikškol, lapsiden da norišton sportškol. Lübiman agrariž-politehnine kolledž^[2] om lidnan professionaližen opendusen aluzkundaks.

• 
  Kivi lidnan alusenpanendan sijas (2006. voz' vai sen aigemba)
• 
  Jumalanmaman Tulendan Pühäpertihe jumalanpert' lidnan kaumžomal, vn 2010 nägu
• 
  Torguindrived vl 2015
• 
  Maižed pudotesed lidnan keskuzpalas i lidnan stadion (2018)
• 
  Laukad (2015, ende Lobanov-torgovanan radhonuz)

1. ↑ Lübiman pühäpertid sobory.ru-saital. (ven.)
2. ↑ Lübiman agrariž-politehnižen kolledžan sait (pu47.edu.yar.ru). (ven.)

• Lidnankundan tobmuden aluzkundoiden oficialine sait (любим-адм.рф). (ven.)

Lübim Vikiaitas