Hanau

Hanau

Lidnanznam	Flag
Valdkund	Saksanma
Eläjiden lugu (2020)	97,137 ristitud
Pind	76,47 km²
Pämez'	Klaus Kaminski (2003—, Claus Kaminsky)
Telefonkod	+49−6181
Aigvö	tal'vel UTC+1, kezal UTC+2

Hanau (mugažo saksan kelel, virktas [ˈhaːnaʊ̯]) vai Hanau Mainal (saks. Hanau-am-Main) om lidn Saksanman päivlaskmas, Gessen-federacijanman suves. Mülüb Darmštadtan administrativižhe ümbrikho.

Mainitase ezmäižen kerdan kuti feodaližen Hanau-rodun lidnuz vl 1143. Eländpunkt om lidnan oiktusidenke vspäi 1303. Vl 1813 tora Hanaunno tegihe francižiden i avstriž-bavarižiden sodavägiden keskes. 1820-nzil vozil hurarandaižen da oigedrandaižen Hanaun administracijad ühtištuihe. Vspäi 1848 raudtestancii radab lidnas.

Toižen mail'man sodan aigan vn 1945 keväz'kul britanižed lendimed panihe mantazole vanhan lidnan tobmad palad. Sil aigalpäi lidn om saudud möst.

Hanau om kalližarvoižiden metalloiden ümbriradmižen keskuz 16. voz'sadaspäi. Äisarakoižen «Heraeus»-kompanijan päfater i sen tegimed oma lidnas (elektroladimed, medicinižed substancijad, kalližarvoižed metallad). Äi eläjid ajeltas rata Frankfurtha.

Lidn sijadase Main-jogen muugotil randoil, 104 m ü.m.t. keskmäižel korktusel. Port om Mainan oiktal randal, se i raudtestancii sätas transportteiden znamasišt sol'med. Lähembaine sur' lidn om Frankfurt Mainal 25 km päivlaskmha.

Hanau jagase kümneks lidnrajonaks (saks.: Stadtteil).

Vl 2013 eläjiden lugu oli 89 907 ristitud. Kaikiš suremb ristitišt om nügüd'.

Religijan mödhe (2011) lidnalaižiden nelländez om protestantad, toine nelländez om katolikad, pol' om religijatomad vai toižed uskojad.

• Lidnan ohjastusen oficialine sait (hanau.de). (saks.)

Hanau Vikiaitas