Cecil Rhodes

Cecil Rhodes

Biografia
Nasimènto	(en) Cecil John Rhodes 5 de lujo del 1853 Bishop's Stortford (Inghiltera) (it)
Mòrte	26 de marso del 1902 (48 ani) Muizenberg (it)
Càuza de morte	Càuze nadurałi  (Insufisensa cardìaga )
Liogo de sepełimento	Rhodes Grave (en) Gwanda (it)
2o Primo Ministro de ła Cołònia del Cao
4 de majo del 1893 – 12 de zenaro del 1896 ← Cecil Rhodes – John Gordon Sprigg (it)  →
1o Primo Ministro de ła Cołònia del Cao
17 de lujo del 1890 – 3 de majo del 1893 ← John Gordon Sprigg (it) – Cecil Rhodes →
Menbro del Consejo Privà del Regno Unio
Menbro del Consejo Privà de Irlanda
Dati personałi
Ideołozìa pułìtega	Inperiałismo
Rełijon	Angleganismo
Atività
Ocupasion	inprendidor, esplorator, cołonizador, economista, pułìtego, fiłàntropo
Fameja
Cògnuze	nisun vałore
Fradełi	Frank Rhodes (en)
Segno

Cecil John Rhodes (5 lulio 1853 – 26 marso 1902) el xera on sudafricano de origine inglexe. Omo de afari, posidente e politego, Rhodes el ga fondà la De Beers, na compania che na olta la controlava el 90% del marcà de i diamanti. Ancò la De Beers la controla el 60% del marcà. Rhodes el credea a la superiorità britanica e el ga tentà de costruir on inpero che portase la cultura inglexe in tel mondo. Traverso la so Conpania Britanica Sudafricana el ga controlà i teritori de la Rhodesia del sud e del nord (ancò Zinbabwe e Zanbia), ciamadi così in so onore.

Cecil Rhodes el xera fiol de Francis William Rhodes, on prete anglicano, e de Louisa Peacock. Cecil el ga vù tanti fradei, tra i pi famoxi Francis William, el pi vecio e on colonel de l’esercito, e Herbert, on latifondista in Sudafrica. Co Cecil el xe stà malà, la fameja la lo ga mandà da so fradel Herbert in Natal par curarse e laorar in na piantagion de coton. Dopo chel ga laorà co so fradel, el zoino Rhodes el xe ndà a Kimberley in tel otobre 1871. Rhodes el xe stà bon de otener on finansiamento da N.B. Rothschild & Sons e el ga scominsià a costruir el so inpero ne le fortune minerarie. Co i so conpari John Merriman e Charles Rudd el xe rivà a controlar el marca sudafricano. Co i schei de i primi diamanti, Rhodes el ga cronpà de le fatorie, ona de queste – Vooruitzicht – la xera de Johannes Nicolaas De Beer. Sto nome el finirà par esar quelo de la so conpania diamantifera. Dopo verghe lasà i so afari in man de i so soci, Rhodes el xe ndà a Oxford par finir l’università (1873, e 1876-77)

En tel 1874-75, durante na pausa de i studi, Rhodes el ga consolidà la so presensa in Kimberley, vinto el contrato par ponpar l’acqua fora da le miniere e asicurà lo sfrutamento de altri tereni. En tel 1880 el ga fondà la De Beers Mining Conpany (Conpagnia Mineraria De Beers) che la xe presto diventà la pi inportante conpania de Kimberley.

En tel 1880, Rhodes el se sa presentà par el segio de Barkly West, on distreto del Griqualand abità da boeri. El xe stà eleto e el xe restà parlamentare tuta la so vita. En tel 1890, Rhodes el xe diventà el Primo Ministro de la Colonia del Cao. Da primo ministro el ga scrito legi che le jutava le conpanie minerarie e le industrie. Tra ste legi la Glen Grey, na lege che la permetea lo spostamento forsà de i neri par farghe posto a l’industria. En tel 1895, Rhodes el ga sostegnù on ataco militare contro la Republica del Transvaal, el Jameson Raid. El ataco el xe falio e so fradel Frank el xe fini in prison. Rhodes el ga dovù dar le dimisioni da primo ministro.

Rhodes el volea slargar el inpero britanico. Rhodes el ga senpre credù che la cultura inglexe la fuse la pi inportante del mondo. La so prima mosa la xe stà quela de espandarse a nord. El ga visità i cai pi inportanti de i teritori a nord del Transvaal par otener le concesioni minerarie. A lo steso tenpo, el xe senpre riusio a otegnar el protetorato inglexe so le concesioni minerarie. Da na parte lu el ge gudagnava i diriti comerciali, da qe l’altro el slargava la zona de influensa de el Regno Unio. Rhodes nol volea che la Corona inglexe la se interesase diretamente de i so teritori. El so pian el xera de ciamar coloni inglexi e marcanti come lu par parar vanti le colonie. Londra no la gavea schei par pagar i aministratori, lu el ga proposto de pagar de tasca sua co l’acordo de tegnarse tuti i diriti de le miniere. El governo inglexe el xe stà dacordo parché così se tegnea portoghexi, todeschi e boeri lontan da i teritori del nord.

Rhodes el ga provà varie olte a verghe concesioni in tel Matabeleland. En tel 1888, el ga mandà da el re Lobengula John Moffat, fiol de on misionario che el re stimava. Moffat e Francis Thompson, ono de i agenti de Rhodes, i ga promeso che solo diexe bianchi i gavaria laorà inte le miniere in Matabeleland. En tel documento scrito, ste robe no le gera. El gera invese la clausola che la Conpania Britanica del Sudafrica (BSAC) la podea far quel che la volea. Co el re se n’a incorto, el volea blocar el contrato, ma i inglexi i no ga sentio storie. Co sto sistema, Rhodes el ga otegnù concesioni da tuti i grandi cai de la region. El ga anca tentà de entrar in Katanga (Congo), ma el re Msiri el xe sta pi furbo de lu e el ga dito de no. Rhodes el ga domandà de verghe la concesion so el Bechuanaland (ancò Botswana), ma tre cai – tra questi Khama III - i xe ndà fin a Londra par rimaner soto l’aministrasion inglexe direta. Co i ga vinto, Rhodes el ga comentà: “La xe na umiliasion, esar batù da tri negri”.

La BSAC la ga formà el so corpo paramilitare par controlar i teritori in concesion. Tanti de i coloni che i xe ndà in Africa par diventar minatori, i xe invese pasà a l’agricoltura. La BSAC la ga conbatù varie guere co i ndebele e i shona. I teritori de la BSAC i no gavea on nome.La zente la scominsià a parlar de Zanbesia, dal Fiume Zanbesi. En tel magio 1895 el nome el xe stà canbià oficialmente in Rhodesia del Sud, par i teritori che i formarà el Zinbabwe, e Rhodesia del Nord-Ovest e del Nord-Est, par i teritori che i formarà el Zanbia. A la so morte in tel 1902, Rhodes el xe stà portà a Matobo, rente de la sità de Bulawayo, e sepelì so la colina che ga na vista so i vasti altipiani de l’Africa, come el gera scrito in tel so testamento.

Rhodes el ga senpre sostegnù el partio liberale, ma anca el partio nasionalista irlandexe. En Sudafrica, el xera tolerante verso i sitadini de origine olandexe e el ga pagà de tasca soa parché i podese verge le scole par studiar in olandexe. A la so morte, el ga lasà quasi tuta la so propietà in Sudafrica al governo locale, e destinà i profiti de le so conpanie par pagar i studi a Oxford a zoeni de le colonie inglexi.

Portałi:
• Portałe de Africa
|

• Wikimedia Commons el detien imàjini o altri file so Cecil Rhodes
• Scholia el detien schemi gràfeghi so Cecil Rhodes