Nağme-i Seher/â uyaklı Târih-i Vefât

Kân-ı hayâ vü genc-i vera' mîr-i Sâlim'in
Gelmez nazîri zühd ü salâh ile bî-riyâ

Akl u ferâset idi haber kendisinden âh
K'olmuştu zâtı cümle fezâ'ilde mübtedâ

Nevres-civân idi veli bâlâ-yı nâzını
Bâr-ı girân-ı ilm ü hüner kıldı hemçü yâ

Hurşîd-i fazl u himmete kendi sipihr idi
Rûyunda nûr-ı ismet olur idi rû-nümâ

Âhir buna da gözlerini dikti çarh-ı dûn
Bir derd-i can-hırâşa kim etmişti mübtelâ

Bulunmayub devâsı cihânı edince terk
Ahbâb ü vâlideynine kaldı gam u bükâ

Târîh-i fevtini dedim * Ekrem* du'â edip
Dârü's-selâmı Sâlim'e câ eylesin Hudâ

sene 1279