Lausitz

Ju Lausitz (oulat fon n ooldsorbisk Woud foar sowät as Sump-Lound, läichsorbisk Łužyca, buppersorbisk Łužica, poolsk Łużyce), is n Rebät in't Suudaaste fon do Brandenbuurich, dät Aaste fon Saksen un dät Wääste fon do Poolske Woiwodskuppe Lebus un Läichsleesien.

Ju Lausitz deelt sik in ju Läige Lausitz un ju Bupperlausitz:

Ju Läige Lausitz is foar't Maaste n läich, plat Lound, dät fon ju poolske Äi Bóbr (düütsk:Bober) bit oun't Skeed tou dän Fläming un bit oun ju Äi mäd Noome Čorny Halštrow (buppersorbisk) / Schwarze Elster (düütsk) gungt. Dät roate deer uurspröängelk fuul Foane, Brouk-Woolde, fääre uk Holtbuske mäd boukene un eekene Boome. Sänt dät 19. Jierhunnert sjucht me wät moor Fjuurenboome. In ju Loundskup lait uk die Spreewoold, mäd masse Woaterloope, do foar hiere Bootjeräi bekoand sunt.

Ju Bupperlausitz lait deer täämelk niep suudelk fon un sjucht lounskuppelk uurs uut as ju Läige Lausitz. Sjucht me fääre noudelk noch Heedelound, gungt dät in't Suude, loangs dät Skeed ätter Tschechien, ap in do Lausitzer Bierge. Deer lait uk mäd 793 Meetere die hoochste Bierich fon ju Lausitz, ju Łysa (buppersorbisk) / Lausche (düütsk) / Luž (tschechisk).

In groote Deele fon ju Lausitz wäide noch do bee Sorbiske Sproaken boald, dät Buppersorbiske un dät Läichsorbiske. Fääre wäd deer uk düütsk boald, näämelk aastmiddeldüütske Dialekte un ju Näilausitzer Baalwiese, ju sorbisk Substroat änthoaldt. Wier dät ätter Polen iengungt, wäd Poolsk boald, in düt Rebät is ne dialektoale Miskenge foarhäärskjend, uumdät do maaste Polen deer eerste ätter dän Kriech un ju Ferdrieuwenge fon ju düütsk-sleesiske Befoulkenge waileeken sunt.

Bekoande Stääde in ju Lausitz sunt

• Chóśebuz (läichsorb.) / Cottbus (düütsk)
• Budyšin (buppersorb.) / Bautzen (düütsk)
• Ju DDR-Ploanstääd Eisenhüttenstadt