Renaud

Renaud Pierre Manuel Séchan, conegut per son pichon nom Renaud (París, 11 de mai de 1952) es un cantaire popular francés, tanben autor compositor e actor. Sas cançons contenon sovent de criticas socialas e arribèron a generar cèrtas polemicas coma Miss Maggie, enregistrada en 1985 e espelida en single en 1986, qu'èra una mena de panflet virulent contra la primièra ministra anglesa d'aquel temps, Margaret Thatcher.

Musicalament, fa de cançon francesa a tèxte, en eredèr de los de las annadas 50 e 60 coma Georges Brassens o Mouloudji, cançon engatjada (Manhattan-Kaboul, Hexagone, Société tu m'auras pas, Déserteur, Deuxième génération, Marchand de cailloux), cançon umoristica (Laisse béton, Mon HLM, Marche à l'ombre, Mon beauf, Les aventures de Gérard Lambert, Ma chanson leur a pas plu) o simplament melancolica (Mistral Gagnant, Morgane de toi, En cloque, Ma gonzesse, Chanson pour Pierrot, Manu) o alavetz d'influença fòlc americana (genre : Bob Dylan) en version francesa, dins l'esperit assumit de Hugues Aufray (Dès que le vent soufflera) ; se sarra tanben de temps en temps del rock vertadièr ambe tròces coma Jonathan (cançon omenatge a Johnny Clegg), C'est mon dernier bal, Loulou, Allongé sous les vagues ou encara Docteur Renaud, Mister Renard.

A mai d'emplegar l'argòt, o lo verlan dins mantunas cançons, lo cantaire s'es clarament posicionat en favor de las lengas dichas regionalas de l'estat francés e sortiguèt en 1993 un album en picard Renaud cante el' Nord.