Samsi-Addu

Samsi-Addu ò Shamshi-Adad^[1] es un rèi de la ciutat mesopotamiana d'Ekallatum que reinèt vèrs 1815-1775 avC). Succediguèt a Erishum II e foguèt remplaçat per Ishme-Dagan I^èr. Son periòde correspònd a un renfòrçament considerabla de la poissança d'Ekallatum que venguèt lo centre dau Reiaume de Mesopotamia Auta^[2].

Fiu d'Ila-Kabkabu, es originari d'una dinastia amorrita liada a aquela de Babilònia. Lo començament de son rèine foguèt malaisat amb una desfacha còntra Naram-Sin d'Eshnunna que prenguèt lo contraròtle d'Ekallatum. Sostengut per lo rèi Sin-Muballitde Babilònia, Samsi-Addu aprofichèt la mòrt de son adversari per reconquistar Ekallatum vèrs 1810 avC. Puei, gràcias a una politica de conquistas militaras, ocupèt la Mesopotamia Auta, compres lei vilas d'Assur e de Mari. A la fin deis ans 1790 avC, arrestèt son expansionisme militar per organizar son Estat e estabilizar sei conquistas. Per aquò, concluguèt d'alianças amb Ishkhi-Addu de Qatna e amb Dadusha d'Eshnunna. Mantenguèt tanben son aliança amb Babilònia. Pasmens, son poder s'afebliguèt dins leis ans 1780 avC en causa d'una epidemia grèva dins la region de Mari e de revòutas organizadas per l'aristocracia locala dei vilas somesas. Ansin, a sa mòrt vèrs 1775 avC, lo reiaume de Samsi-Addu se fragmentèt rapidament.

• Ekallatum.
• Mesopotamia.
• Reiaume de Mesopotamia Auta.

• (fr) Nele Ziegler, « Samsî-Addu », dins Francis Joannès (dir.), Dictionnaire de la civilisation mésopotamienne, 2001, pp. 750-752.
• (de) Nele Ziegler, « Šamšī-Adad I », dins Michael P. Streck (dir.), Reallexikon der Assyriologie und Voderasiatischen Archaölogie, vol. XI, 2006-2008, pp. 632-635.

1. ↑ Lo segond tèrme es la forma akkadiana.
2. ↑ Aqueu tèrme es utilizat per leis istorians modèrnes per designar l'Estat fondat per Samsi-Addu. Es pas un tèrme antic utilizat per Samsi-Addu e sei contemporanèus.