Svetlana Isjmuratova

Svetlana Irekovna Isjmuratova, tatarsk Svetlana İrek qızı İşmoratova (fødd 20. april 1972) er ein russisk skiskyttar av tatarsk etnisk opphav. Ho er olympisk meister på 15 km frå OL i Torino i 2006 og fleire gonger verdsmeister på stafett.

Svetlana Isjmuratova var fødd i Zlatoust i Tsjeljabinsk oblast. Far hennar var skitrenar, og ho begynte å stå på ski som femåring, men først i 1996 gjekk ho over frå langrenn til skiskyting. Ho vann sitt første VM-gull på stafetten i Pokljuka i 2001. I OL i Salt Lake City i 2002 fekk ho bronse med stafettlaget. I VM i Khanty-Mansijsk i 2003 fekk ho sølv på fellesstarten og bronse på jaktstarten. I 2006 vann ho sitt første verdscuprenn, og kvitta seg med stempelet som evig toar, etter at ho hadde fått andreplass 12 gonger. I OL i Torino nådde karrieren hennar eit nytt høgdepunkt då ho vann gull på 15 km og var med å vinna gull med stafettlaget.

Isjmuratova la opp som skiskyttar etter 2006-sesongen. I desember 2007 vart ho vald inn i det russiske parlamentet, Dumaen, for partiet Sameint Russland.

(per 28. februar 2006)

• Verdscupen samanlagt:
  • 6. plass (1999/2000)
• Verdsmeisterskap:
  • 4 gull, 2 sølv, 1 bronse (beste individuelt: sølv på fellesstart, 2003)
• Olympiske leikar:
  • 2 gull (15 km, Torino 2006), 1 bronse
• Verdscuprenn:
  • 2 gull, 13 sølv, 9 bronse

• «Svetlana Ishmuratova». olympedia.org. Henta 15. november 2022.