Dit is allens Entwurf un noch kene faste Regel vun Wikipedia. Jedereen dröff geern seggen, wat he dorvun höllt. Besünners good weer dat man, wenn ji Bispelen finnen kunnen, bi de disse Regeln versagt. Dat also relevante Artikels na disse Regeln nich relevant sünd oder annersrüm, temlich unrelevante Artikels na de Regeln relevant wesen schullen. Annere Kritik is aver man ok willkamen ;-)

---

Wikipedia as Nakieksel, bi dat jedereen in Wiki-Wies mitdoon kann, bruukt Regeln, wat för Artikels wi in dit Nakieksel opnehmen wüllt un wat för welk nich. Disse Siet schall Regeln opstellen, op wat för’n Oort un Wies dat faststellt warrt. Bi en Artikel mööt de Kriterien vun disse Siet wohr wesen, dat de Wikipedia em opnehmen deit. De Kriterien sünd aver Twiefel-Kriterien, dat heet, prüüft warrt eerst, wenn en Bruker an de Relevanz twiefelt. Dat Prüfen vun den Artikel vör dat Instellen warrt nich vörutsett (is aver nich verkehrt, wenn een sik al vörher överleggt, wat de Artikel relevant is).

Dat gifft dree Typen vun Kriterien:

• jümmer: Wenn dit Kriterium erfüllt is, denn is de Artikel jümmer relevant.
• na Punkten: Bi welk Kriterien kann de Artikel Punkten sammeln. Wenn he opminnst teihn Punkten tohoopkriggt, denn is he relevant. Punkten in verschedene Kategorien warrt tohooptellt.
• na Minschenverstand: för dissen Typ vun Artikels gifft dat kene fasten Regeln. De Lüüd, de de Relevanz beoordeelt, schöölt den gesunnen Minschenverstand bruken.

Grundregel is, dat en Artikel opminnst dree Fakten över de Saak nömen mutt (de Naam sülvst tellt noch nich as Fakt) un todem in den Text soveel Relevanzkriterien nöömt, dat ut den Artikel rut kloor is, dat he na disse Siet relevant is. Grundfakten tellt na de Dree-Fakten-Regel nich as Fakten. Grundfakten sünd dorbi Fakten, de de Grundlaag dorstellt, ahn de en Artikelgegenstand keen Bestand hebben kann. En Barg tekent sik ut, dat he ut de Ümgegend rutsteiht. Wat grötter he is, wat bedüdener is he. De Hööchd vun en Barg is also en Grundfakt, de Grundbasis för siene Relevanz. En Oort is en Steed an de Minschen leevt. Also sünd de Steed/de Laag vun en Oort un de Inwahnertall Grundfakten för en Oort. Wenn en Grundfakt fehlt, denn tellt dat minus een för de Dree-Fakten-Regel.

Bispelen:

Ludwig II. weer König vun Bayern. <span style="color:red;">reckt nich! König reckt as Relevanz, man kene dree Fakten nöömt.</span>

Ludwig II. (* 25. August 1845; † 13. Juni 1886) weer König vun Bayern. Nadem he an’n 10. Juni 1886 entmünnigt worrn is, övernehm sien Unkel Luitpold as Prinzregent de Regerensgeschäften. <span style="color:green;">reckt. Amt, Entmünnigung un Övergeven vun de Regerensgeschäften sünd dree Fakten, Geboortsdag plus Doodsdag (also Levenstiet) is Grundfakt bi en Minsch, König is jümmer-Relevanzkriterium.</span>

Wenn en Artikelgegenstand vun de Saak her in mehr as ene Kategorie passt, denn warrt de Kategorie nahmen, de för de Opnahm dat beste Resultat bringt.

Wenn in disse Regeln Geldbedrääg nöömt warrt, denn sünd de so to verstahn, dat de Artikelgegenstand den Äquivalentweert vun dissen Bedrag to siene Tiet anrecken mutt. As Utgangspunkt för de Tallen in disse Kriterien is de Kurs vun’n Euro to’n 1. Januar 2008 utslaggevend (bi annere Geldsoorten schall nich de Wesselkurs, man de Koopkraft tellen).

Ringslüss sünd generell utnahmen, wenn se nich vun buten stütt sünd. De Filmartikel X ist relevant, vun wegen dat de relevante Schauspeler Y dor mitspeelt un de Schauspeler Y is relevant, vun wegen, dat he in den relevanten Film X mitspeelt gellt nich. Dat heet, wenn Artikels blot as Paket rinkamen köönt, denn mööt se all buten blieven.

Dör den Text mutt wiest warrn, dat de beschrevene Saak egenstännig gegen annere Saken is, de ’n Artikel hebbt. Wenn to’n Bispeel Artikel X vullstännig beschreven is dör X is en Y, blots ahn/mit Z, denn schall X beter bi Y mit beschreven warrn.

Vör allen sünd de Relevanzkriterien antowennen bi Elementen vun gröttere Gruppen vun potentielle Artikelgegenstänn. Dat heet sowat as Bargen. Bargen gifft dat Millionen in all Grötten. Nich all Bargen sünd relevant. De Relevanzkriterien seggt, wat för Bargen relevant sünd. Op de anner Siet gifft dat Saken, de sünd nich Element vun Gruppen, to’n Bispeel de Artikel Barg sülvst. De Begreep Barg is en Konzept. För disse Konzepten sünd de Relevanzkriterien weniger.

Dat gellt de Spoorsamkeitsregel. Wenn twee Objekten formal beid relevant sünd - aver all beid dör den exakt glieken Grund - un wenn dat nu dorto föhren dee, dat de Artikels swoor vunenanner aftogrenzen sünd, denn warrt blots een vun de beiden as Artikel anleggt un de annere verwiest op den annern. Bispeel: En middelöllerlichen Schriever is blots as Schriever vun ene enkelte Schrift bekannt. Nu maakt dat kenen Sinn, för Schriever un Schrift twee Artikel to schrieven. Beid Saken schöölt in een Artikel tosamen beschreven warrn. Oder wenn Tweeschen as Künstlerduo optreden sünd un nienich alleen wat maakt hebbt, denn bruukt de beiden nich all beid egene Artikels. Een Artikel reckt.

Artikels, de in een vun de Nakieksels en Indrag hebbt, de glieks nöömt warrt, sünd jümmer relevant (Artikels, de as Wöörbookindrääg antosehn sünd, sünd dor vun utnahmen. Ok utnahmen sünd Artikels to Saken, de dat na hüdig Weten gor nich gifft, de also Nihilartikels sünd oder Blöten vun korte Irrweeg vun de Wetenschoppen dorstellt. Wenn de Artikel aver in twee Nakieksels vörkaamt, de nich ut de sülve Fedder kaamt, denn warrt ok bi disse Nich-Artikels Relevanz annahmen.):

• Brockhaus, Encyclopedia Britannica, Encyclopédie ou Dictionnaire raisonné des sciences, des arts et des métiers, Enciclopedia Espasa, Paulys Realencyclopädie der classischen Altertumswissenschaft, Nordisk familjebok, Biographisch-Bibliographisches Kirchenlexikon, Allgemeines Künstlerlexikon, Thieme-Becker

Notiz: Disse List schall nich vullstännig wesen. Ne’e Nakieksels köönt opnahmen warrn, wenn kloor warrt, dat Objekten, bi de de Brukers övereenstimmt, dat se nootwennig för ene kumplette Enzyklopädie sünd, över annere Kriterien kene Opnahm finnen köönt. Dat Nakieksel mutt aver de Regeln vun anspruchsvulle, wetenschopliche Enzyklopädien oder Nakieksels folgen.

• En Artikel kriggt:
  • 3 Punkt je Book/Film, dat/de över dat Artikelthema schreven/maakt worrn is.

• Personen un Deerten sünd jümmer relevant, wenn se vör 700 n. Chr. leevt hebbt, un wenn wi den Naam kennt un tominnst twee opschrevene Saken över jem hebbt.

• Ene Person/En Deert kriggt:
  • 3 Punkt je Straat, de na de Person/dat Deert nöömt is.
  • 5 Punkt je Oort, de na de Person/dat Deert nöömt is.
  • 2 Punkt je wetenschoplich Objekt (ne’e Oort, Mineral, Himmelskörper etc.), de na de Person/dat Deert nöömt is.
  • 2 Punkt je Denkmal/Born, dat/de för de Person/dat Deert opstellt worrn is.
  • 5 Punkt je Museum, dat sik alleen mit de Person/dat Deert befaten deit.
  • 1 Punkt je fiktiv Wark, in dat düüdlich op dat de Person/dat Deert anspeelt warrt.
  • 1 Punkt, wenn de Person/dat Deert ümbrocht worrn is oder sik sülvst ümbrocht hett.
  • 1 Punkt je Öllerndeel oder Kind vun de Person/dat Deert, dat för ’n Artikel relevant is.
  • 3 Punkt je Pries, de för ’n Artikel relevant is, den de Person/dat Deert kregen hett un de an besünnere Leistungen vun qualitative Natur bunnen is.

• Lüüd sünd jümmer relevant, wenn se as Gerechten mank de Völker ansehn warrt.

• Ene Person kriggt:
  • 1 Punkt, wenn se ’n Doktergraad hett.
  • 2 Punkt je Institutschoon, de för ’n Artikel relevant is un de se anföhrt hebbt (politische un religiöse Rebeetsentitäten utnahmen).
  • 1 Punkt, wenn se ut politsche Grünn in Haft weer, veroordeelt worrn is oder twungen weer in Exil to gahn.
  • 3 Punkt, wenn se ene Saak, de för ’n Artikel relevant is, begrünnt hebbt (Ünnernehmen, Organisatschoon, Stilrichtung etc.).

Regel: De Bundslänner vun Düütschland, de Provinzen vun de Nedderlannen, de Bundsstaten vun de USA un internatschonale Statenbünn mit mehr as fief Staten as Liddmaten warrt in disse Relevanzkriterien jüst as Staten behannelt.

Regel: As Politikers gellt ok de Staatsböversten vun Staten, de kene Demokratie hebbt, to’n Bispeel Monarchen etc.

• Politikers sünd jümmer relevant, wenn se en Amt op Staatsevene harrn un dit Amt in de Verfaten vun den Staat fastleggt is.

• Präsidenten vun Staten sünd jümmer relevant.
• Ministers vun Staten sünd jümmer relevant.
• Liddmaten vun dat Parlament vun Staten sünd jümmer relevant.

• En Börgermeester kriggt:
  • 1 Punkt för je vulle 10.000 Lüüd för de he Börgermeester weer.
  • 0,5 Punkt för je vulle fief Johr, de he Börgermeester weer.

• En Vörsitter vun ene relevante Partei kriggt:
  • 1 Punkt för je vulle 500 Lüüd, de in de Partei sünd.
  • 1 Punkt för je vulle fief Johr, de se Vörsitter weern.

• En Politiker kriggt:
  • 3 Punkt för de Deelnahm an ene verfatengeven Versammlung.
  • 1 Punkt je vulle fief Johr in en Parlament in dat he seten hett, dat för mehr as 10.000 Lüüd politische Entscheidungen maakt.

• Vörsitters vun Partein sünd jümmer relevant, wenn de Partei to ehr Vörsittertiet in dat Parlament vun en Staat seet.

• En Gewerkschafter kriggt:
  • 1 Punkt je twee Johr, de he ene Gewerkschaft anföhrt hett, de för ’n Artikel relevant is.

• En Diplomaat kriggt:
  • 2 Punkt je fief Johren, de he Bottschopper in en annern Staat weer.

• Richters an dat hööchste Gericht vun ’n Staat sünd jümmer relevant.
• En Richter kriggt:
  • 2 Punkt för dat Richteramt.

• En Ünnernehmer/Manager kriggt:
  • 1 Punkt je 200 Millionen Euro Ümsatz, de dat vun em anföhrte Afdeel vun dat Ünnernehmen maakt hett.

• En Programmerer kriggt:
  • 3 Punkt je Programm, dat för ’n Artikel relevant is un dat he alleen programmeert hett.

kiek bi #Sport.

• En Schriever kriggt:
  • 2 Punkt je Book, dat he alleen schreven hett.
  • 4 Punkt tosätzlich je Book, wenn dat op Plattdüütsch schreven is.
  • 1 Punkt tosätzlich je Book, wenn dat mehr as 200 Sieden Text hett.
  • 1 Punkt je Book, dat he alleen översett hett.

• En Künstler kriggt:
  • 1 Punkt je Utstellung in för en Artikel relevante Galerien/Museen.
  • 1 Punkt je 100.000 Euro, de een vun sien Original-Warken inbröcht hett (Maximalpries vun dat Wark).

Notiz: Original-Warken sünd Live-Kunzerte, Biller, Skulpturen un annere physische Warken. För Warken, de kopeerbor sünd, so as Toon-Opnahmen, Drucke vun Biller etc., gellt Extra-Regeln.

• En Muskant/Ene Musikgrupp kriggt:
  • 1 Punkt je 3000 verköffte Toondreger.
  • 1 Punkt je Leed, dat he/se sülvst schreven hett/hebbt un dat vun annere relevante Muskanten övernahmen worrn is.

• En Schauspeler/Speelbaas/Dreihbookschriever/Produzent kriggt:
  • 2 Punkt je Film de för ’n Artikel relevant is.
  • 2 Punkt je Serie, de för ’n Artikel relevant is, wenn dat bi opminnst dree Folgen weer (twee Folgen bi Miniserien vun nich mehr as teihn Folgen).
  • 0,3 Punkt je Serie, de för ’n Artikel relevant is, wenn dat bi weniger as dree Folgen weer (blots bi ene Folg bi Miniserien vun nich mehr as teihn Folgen).
  • 0,5 Punkt je Theaterstück bi en Theater, dat för ’n Artikel relevant is.

• En Synchronspreker kriggt:
  • 0,5 Punkt je Film de för ’n Artikel relevant is.

• En Intendant kriggt:
  • 0,5 Punkt je Theaterstück, dat ünner em inszeneert worrn is bi en Theater, dat för ’n Artikel relevant is.

• Bi Kameralüüd, Bildmakers, Toonlüüd, Wandsnieders un Filmsnittjers (jümmer de, de dat Leid över dat Afdeel hett) gellt dat sülve, blots dat de Punkttall in dissen Afsnitt dör 2 deelt warrt.

Regel: Gebruuksfilmen sünd utnahmen. Dorto tellt Pornofilmen ahn künstlerisch Anspruch un ok allens wat för eenmal sennen, denn vergeten produzeert warrt (Daily Soaps, Doku-Soaps, Gerichtsshows etc.).

• En Comic-Teekner/Karikaturist kriggt:
  • 5 Punkt je Comic-Reeg, de för ’n Artikel relevant is un de he alleen maakt hett.

• Bischöp vun de Röömsch-kathoolsche Kark sünd jümmer relevant.
• Kalifen vun den Islam sünd jümmer relevant.
• Hillige vun de Röömsch-kathoolsche Kark sünd jümmer relevant.

• Religions-/Karken-/Deelkarken-/Religionsterritorien-/Sektenanföhrer sünd jümmer relevant, wenn disse religiöse Grupp opminnst 100.000 Liddmaten hett.

• Ene Gottsperson kriggt:
  • 3 Punkt as Anföhrer vun en Klooster, dat för ’n Artikel relevant is.

• Perfessers sünd jümmer relevant, wenn se ornliche Perfessers sünd.
• En Perfesser kriggt:
  • 3 Punkt, wenn he keen ornlichen Perfesser is.

• En Wetenschopler kriggt:
  • 4 Punkt je Oort, de he opdeckt oder toeerst beschreven hett.
  • 4 Punkt je wetenschoplich oder Fack-Konzept, dat för ’n Artikel relevant is un dat he alleen utklamüsert hett.

• Ruumfohrers sünd jümmer relevant.

Notiz: Kann in Tokumst ännert warrn, dat blots noch Ruumfohrers, de vör dat Johr X in den Weltruum reist sünd, jümmer relevant sünd plus Punkt-Regeln.

• Suldaten sünd jümmer relevant, wenn se General oder Admiral (oder annere Räng, de de sülvige Rangstuuf as General/Admiral hebbt) bi ene offizielle Armee sünd.
• En Suldaat kriggt:
  • 3 Punkt, wenn he Heerföhrer weer.
  • 3 Punkt, wenn he een Rangstuuf ünnern General/Admiral steiht.
  • 2,5 Punkt, wenn he twee Rangstufen ünnern General/Admiral steiht.
  • 2 Punkt för ’n Offziersrang, de mehr as twee Rangstufen ünnern General/Admiral steiht.

• En Architekt kriggt:
  • 3 Punkt je Bowark, dat för ’n Artikel relevant is un för dat he de Architekt weer.

• En Kunsthandwarker kriggt:
  • 2,5 Punkt je Kunsthandwarkstück, dat vör 1800 trech worrn is un to den Kunsthandwarker fast tooornt warrn kann.

• En Adeligen kriggt:
  • 2 Punkt, wenn he ’n Adelstitel hett.

Regel: Dat gellt för Adelige, bi de jemehr Titels to jemehr Tieden allgemeen vun de Sellschop anerkannt weern (Kaiser Norton I. kriggt hier kene Punkten).

• En Adelsgeslecht kriggt:
  • 2 Punkt je Person ut dat Geslecht, dat för ’n Artikel relevant is.
  • 3 Punkt för ’n Stammsitt, de för ’n Artikel relevant is.
  • Teihn Perzent vun de Relevanz-Punkten vun all de Personen ut dat Geslecht (Ok wenn de enkelten Personen an de nödige Tall för egene Relevanz nich ranreckt).

• En Möörder kriggt:
  • 1 Punkt je Person, de he ümbrocht hett.
  • 5 Punkt je Person, de he ümbrocht hett un de för ’n Artikel relevant is.
• En Röver kriggt:
  • 1 Punkt je ene Million Euro Geldweert, de he röövt hett.
• En Gesettsbreker kriggt:
  • 1 Punkt je straafrechtlichen Gesettsbrook, för den he veroordeelt worrn is, wenn he ok ans noch relevant is. (Maximaltall ünner dissen Punkt: 5 Punkt)

Regel: Wenn de Person aver blots dör ene enkelte Daat bekaant worrn is, denn warrt disse Daat opnahmen, nich de Person.

• En Boulevard-Prominenten kriggt:
  • 1 Punkt je 10 Millionen Minschen, de den Naam vun de Person ut de Medien kennt (Meten to ene Tiet, de opminnst dree Maand vun dat eerste Optreden in de Medien af is).

• Ene Organisatschoon kriggt (ok Verenen, Partein):
  • 1 Punkt je 250 Liddmaten, de se hett (Maximaltall in de Geschicht).
  • 0,5 Punkt je 10 Johren, de se Bestand hett.
  • 1 Punkt je Book, bi dat se Rutgever weer.

• Beroopsfüürwehren sünd jümmer relevant.

• Ene Karkengemeen/En Karkenterritorium kriggt:
  • 1 Punkt je 100 Gemeenliddmaten, de se/dat hett (Maximaltall in de Geschicht).
  • 1 Punkt je 15 Johr, in de se/dat Bestand harr.

• En Deert kriggt:
  • 1 Punkt je 200.000 Euro, de dat bi Wettstrieden in ene Sportoort inspeelt hett.
  • 5 Punkt je Organisatschoon, de för ’n Artikel relevant is un för de dat Maskottchen weer.
  • 1 Punkt je 50 Johr, de dat leevt hett.
  • 2 Punkt, wenn dat in en Museum mit Naam utstellt warrt oder Gedenkstücken vun dat Deert utstellt warrt.
  • 3 Punkt, wenn dat mal in’n Weltruum weer.
  • 3 Punkt je Titelrull, de dat in ’n Film speelt hett.
  • 1,5 Punkt je Hööftrull, de dat in ’n Film speelt hett.
  • 1 Punkt, wenn de Besitter oder dat Herrchen ene Person weer, de för ’n Artikel relevant is.

• En Ünnernehmen kriggt:
  • 1 Punkt je teihn Millionen Euro Ümsatz in’t Johr (Maximaltall in de Geschicht).
  • 1 Punkt je 15 Johr, in de dat Bestand harr.
  • 1 Punkt je 250 Lüüd, de dor arbeiden doot (Maximaltall in de Geschicht).
  • 1 Punkt je 10 Filialen, de dat hett (Maximaltall in de Geschicht).

• Ünnernehmen sünd jümmer relevant, wenn se an ene Böörs noteert sünd.

• En Stiften kriggt:
  • 1 Punkt je teihn Millionen Euro Stiftenskapital.

• Ene Produktmark kriggt:
  • 1 Punkt je 5 Millionen Lüüd, de se kennt.

• Ene Produktreeg/En Produktmodell kriggt:
  • 1 Punkt je 5 Millionen Lüüd, de se kennt.
  • 5 Punkt, wenn se ’n Produkttyp begrünnt hebbt (Bispeel: Tamagotchi för den Produkttyp virtuelle Huusdeerten).

• Oorden in de Biologie un annere Taxons sünd jümmer relevant, ok wenn se vun de aktuelle Wetenschop nich mehr as aktuell ansehn warrt.
• Rassen vun Oorden sünd jümmer relevant, wenn se vun de allgemeen anerkannte Instanz för Tucht bi disse Oort (to’n Bispeel FCI bi Hunnen) as Rass ansehn warrt.

• Kryptiden sünd jümmer relevant, wenn dat to jem ’n Volksglöven gifft.

Regel: As Book na disse Siet gellt kene Schriften vun 50 Sieden oder weniger, wenn de nich för ’n Artikel relevant sünd.

• Böker/Schriften sünd jümmer relevant, wenn dat ’n Film to’t Book gifft, de för ’n Artikel relevant is.
• Schriften sünd jümmer relevant, wenn se vör dat Johr 1000 n. Chr. schreven worrn sünd un länger as 1000 Schriftteken sünd.
• Schriften sünd jümmer relevant, wenn se vör dat Johr 1500 n. Chr. schreven worrn sünd, keen Gebruukstext sünd un länger as 1000 Schriftteken sünd.
• Böker sünd jümmer relevant, wenn se vör dat Johr 1700 n. Chr. schreven worrn sünd un keen Gebruukstext sünd.

• En Book kriggt:
  • 1 Punkt je 10.000 verköffte Stück.
  • 5 Punkt, wenn dat op Plattdüütsch schreven is.
  • 1,5 Punkt je Spraak, in de dat översett worrn is.

• Tietschriften/Bläder sünd jümmer relevant, wenn se op Plattdüütsch schreven sünd.

• Ene Tietschrift/En Blatt kriggt:
  • 1 Punkt je Oplaag vun 3000 (Maximaloplaag in de Geschicht), wenn de Tietschrift/dat Blatt opminnst twölf Utgaven sehn hett.
  • 1 Punkt je 10 Johr, in de dat Bestand harr.

Regel: As Film na disse Siet gellt kene Reportaschen oder Dokmentatschonen vun 70 Minuten oder weniger, wenn de nich för ’n Artikel relevant sünd.

• Filmen sünd jümmer relevant, wenn dat en Book to’n Film gifft, dat för ’n Artikel relevant is.

• En Film kriggt:
  • 1 Punkt je 5000 verköffte Kinokoorten.
  • 1 Punkt je 10.000 verköffte Videokassetten.
  • 1 Punkt je 500.000 Tokiekers in’t Feernsehn (bi de Utstrahlung mit de hööchste Tall vun Tokiekers).

• En Musikalbum/Leed kriegt:
  • 1 Punkt je 10.000 verköffte Toondregers.
  • 1 Punkt je Övernahm vun een Leed vun dat Album/dat Leed dör annere Muskanten.

Regel: Single-Utkopplungen ut Alben hebbt kene egene Relevanz, tellt aver to de Tallen vun dat Album dorto.

• Ene Feernsehserie kriggt:
  • 1 Punkt je 100.000 Tokiekers in’t Feernsehn (in’n Dörsnitt bi de Utstrahlung mit de hööchste Tall vun Tokiekers).
  • 5 Punkt, wenn se (ok) op Plattdüütsch utstrahlt warrt.

• Ene Websteed kriggt:
  • 1 Punkt je 50.000 Brukers (Maximaltall in de Geschicht).
  • 1 Punkt je ene Million Besökers in de Week (Maximaltall in de Geschicht).

• Datenbanken sünd jümmer relevant, wenn se opminnst 5.000 Indrääg hebbt un toglieks de gröttste Datenbank vun den speziellen Typ överhaupt sünd.

• En Wiki kriggt:
  • 1 Punkt je 5.000 bruukbore Indrääg.

• En Pries kriggt:
  • 1 Punkt je 200 Euro Priesgeld.
  • 1 Punkt je 10 Johr, in de he vergeven worrn is (unafhängig dorvun, wo faken he in de Tiet vergeven worrn is, solang dat opminnst eenmal weer).

• Feernsehsenners sünd jümmer relevant, wenn se över ’n Tietruum vun opminnst een Maand opminnst fief Stünnen jeden Dag sennt hebbt (Werbung un Verkoopssennungen ut de Tiet rutrekent).

• En Feernsehsenner/Radiosenner kriggt:
  • 1 Punkt je 100.000 Tohörers in de Week (Maximaltall in de Geschicht).

Ünner Reekner-Programmen fallt kene lütten Helpsprogrammen, blot grote Programmen, de en enigermaten veelsiedigen Insatz hebbt.

• Reekner-Programmen sünd jümmer relevant, wenn se de eenzigen Programmen weern, de för jemehr Opgavenrebeet vörhannen weern.

• En Reekner-Programm kriggt:
  • 1 Punkt je 4.000 verköffte/rünnerladene Kopien bi en Programm, dat vör 1990 rutkamen is.
  • 1 Punkt je 20.000 verköffte/rünnerladene Kopien bi en Programm, dat na 1990 rutkamen is.

• Gesetten sünd jümmer relevant, wenn se vun en offiziell anerkannt Staat sünd.

• En Verlag kriggt:
  • 0,25 Punkt je Book, dat he rutgeven hett.
  • 2 Punkt je Book, dat he rutgeven hett un dat för ’n Artikel relevant is.

• Fredensverdrääg twischen Staten oder twischen Staten un nichstaatliche Paramilitärgruppen, de för ’n Artikel relevant sünd, sünd jümmer relevant, wenn se ünnerschreven worrn sünd un ok in Kraft treden sünd.
• Kooperatschoonsverdrääg twischen Staten oder twischen Staten un nichstaatliche Zivilorganisatschonen, de för ’n Artikel relevant sünd, sünd jümmer relevant, wenn se ünnerschreven worrn sünd un ok in Kraft treden sünd.

• Ene Mess kriggt:
  • 1 Punkt je 50.000 Lüüd, de se besöcht hebbt (Gesamtbesökertall in de Geschicht).
  • 1 Punkt je Johr, in dat opminnst 5.000 Lüüd de Mess besöcht hebbt.

• Ene Katastroof kriggt (dat gellt blot, wenn de Katastroof as Doodsoorsaak enkelt nawiesbor is, allgemene Katastrofentostänn so as en besünners hitten Sommer, in den mehr Lüüd doodblievt as ans, gellt dorbi nich):
  • 1 Punkt je 10 Lüüd, de dorbi doodbleven sünd.
  • 2 Punkt je doodblevene Person, de för ’n Artikel relevant is.
  • 1 Punkt je fief Million Euro Schaden.

Regel: Katastrofen schöölt blots denn Artikels kriegen, wenn dat mallöörte Objekt nich sülvst ’n Artikel hett (to’n Bispeel bi Scheep, Flegers usw.).

• Mineralien sünd jümmer relevant, wenn de Mineralogie en egen Naam hett.

• Ene Breefmark kriggt:
  • 1 Punkt je 10.000 Euro, de en enkelt Exemplar weert is.

• Alldagsgegenstänn/Warktüüch sünd jümmer relevant.

Regel: Artikels över Alldagsgegenstänn/Warktüüch mööt opminnst twee Fakten nömen, de nich trivial sünd, dat heet, de en dörsnittlichen Minsch (en Minsch, de mit dat Objekt vertroot is) nich sounso weten deit.

• En Vörnaam/Familiennaam kriggt:
  • 5 Punkt je Person, de dissen Naam driggt un för ’n Artikel relevant is.
  • 1 Punkt je Person, de dissen Naam driggt un för kenen Artikel relevant is.

Regel: Bi Artikels to Naams warrt vörutsett, dat Quellen för de Informatschonen angeven sünd.

• Schriftteken sünd jümmer relevant, wenn se in Unicode opnahmen sünd.

• Eilannen sünd jümmer relevant, wenn se en Naam hebbt oder wenn se fast sünd. As nich-faste Eilannen warrt dorbi de Eilannen ansehn, de ut modderigen Grund bestaht un dör de Arbeit vun’t Water keen Bestand hebbt oder för weniger as 100 Johr Bestand hebbt.
• Bargen sünd jümmer relevant, wenn se en Naam hebbt un opminnst 15 Meter höger liggen doot as de Ümgegend oder wenn se keen Naam hebbt un opminnst 150 Meter höger liggen doot as de Ümgegend.
• Barggruppen sünd jümmer relevant, wenn se en Naam hebbt un ut opminnst dree Bargen bestaht, de för ’n Artikel relevant sünd.
• Seen un Meren sünd jümmer relevant, wenn se en Naam hebbt un opminnst een Hektar groot sünd oder teihn Meter deep. Dorbi mööt se aver duurhaftig oder perioodsch wesen över ene Tiet vun opminnst 100 Johr (dat letzte gellt nich för Seen, de eerst in letzte Tiet vun’n Minsch maakt sünd un Bedüden för Minschen in de Ümgegend vun disse Seen hebbt).
• Strööm un Beken sünd jümmer relevant, wenn se opminnst söss Kilometer lang sünd oder över ’n Tietruum vun opminnst dree Maand in’t Johr opminnst een Kubikmeter Water in de Sekunn föhrt. Dorbi mööt se aver duurhaftig oder perioodsch wesen över ene Tiet vun opminnst 100 Johr (dat letzte gellt nich för Strööm, de eerst in letzte Tiet vun’n Minsch maakt sünd).
• Meteoriten sünd jümmer relevant, wenn vun jem na’n Inslag wat nableven is.
• Geysirfeller sünd jümmer relevant, wenn dor opminnst twee Geysiren, de för ’n Artikel relevant sünd, oder fief lüttjere Geysiren liggt.
• En Geysir kriggt:
  • 1 Punkt je 30 Zentimeter Hööchd, de he sprütt.
• Gletschers sünd jümmer relevant, wenn se mehr as 100 Johr Bestand harrn.
• Naturrüümliche Landschoppen sünd jümmer relevant, wenn se ’n Naam hebbt un nich mit annere Naturrüüm tohoopfallt.

• Öörd sünd jümmer relevant, wenn se en Naam hebbt un to ene Tiet Inwahners harrn un wenn se vun de beboote Fläch her to ene Tiet vun annere Öörd trennt wesen sünd un dorbi na Opfaten vun de Minschen in de Ümgegend, för de de Oort en Bedüden harr, keen Deel vun en annern Oort dorstellen.
• Rebeden, de offiziell vun den Staat inricht worrn sünd, dat Land to verwalten, sünd jümmer relevant.
• Natschonalparkss sünd jümmer relevant, wenn se vun ene anerkannte Institutschoon inricht worrn sünd.
• Wildnisrebeden sünd jümmer relevant, wenn se vun de IUCN anerkannt sünd.
• Kulturelle Landschoppen sünd jümmer relevant, wenn se ’n Naam un na buten hen defineerte Grenzen hebbt.
• En Bargwark kriggt:
  • 1 Punkt je 30 Meter, de dat deep is.
  • 1 Punkt je 100.000 Tonnen Gesteen, de bi’n Afbo bewegt worrn sünd.
  • 1 Punkt je 20 Johr, de dat arbeiden dee.

• En Hoochhuus (för Minschen as Wahnung oder Büros boot) kriggt:
  • 1 Punkt je fief Meter, de dat grötter is as 50 Meter.
• En anner hooch Bowark kriggt (Mast, Schosteen, Funktoorn, Utsichtstoorn etc.):
  • 1 Punkt je teihn Meter, de dat grötter is as 50 Meter.
• En Bowark kriggt:
  • 2 Punkt je Hektar bruukbore Fläch.
  • 5 Punkt, wenn dat as Bodenkmal anerkannt is.
  • 2 Punkt, wenn dat keen Funkschonalbo is (Denkmal, Tierborn, Triumphbagen etc.).

• Ene Attrakschoon kriggt (Zoo, Botaansch Goorn, Stadtpark, Vergnögenspark, Museum, Theater, Oper etc.):
  • 1 Punkt je 100.000 Besökers överhaupt in de Geschicht.
  • 1 Punkt je Hektar Fläch.

• Museen sünd jümmer relevant, wenn se vulltiet apen hebbt (dat heet, se maakt nich blots apen, wenn en Minsch vörbikummt un dat sehn will).
• Universitäten sünd jümmer relevant.
• En Zoo/Botaansch Goorn kriggt:
  • 1 Punkt je 20 Oorden, de dor to sehn sünd.
  • 1 Punkt je 15 Johr, in de he Bestand harr.
• Ene School kriggt:
  • 1 Punkt je 50 Schölers, de se hett.
  • 1 Punkt je 10 Johr, in de se Bestand harr.
• En Krankenhuus kriggt:
  • 1 Punkt je 50 Bedden, de dat hett.
  • 1 Punkt je 10 Johr, in de dat Bestand harr.
• En fast boot Opernhuus, Musicalhuus oder Theater kriggt:
  • 1 Punkt je 30 Sittplätz, de dat hett.
  • 1 Punkt je 10 Johr, de dat Bestand harr.
• En religiös Bowark kriggt:
  • 5 Punkt, wenn dat dör ’n Angreep mit religiös Achtergrund toschannen gahn is.
• En Gottshuus kriggt (Kark, Moschee, Synagoog etc.):
  • 1 Punkt je 10 Johr, in de dat Bestand harr.
• En Klooster kriggt:
  • 1 Punkt je 10 Johr, in de dat Bestand harr.
  • 1 Punkt je 25 Mönken/Nunnen, de dor leevt (Maximaltall in de Geschicht).
• En Karkhoff kriggt:
  • 1 Punkt je Hektar Grött.
  • 1 Punkt je Person, de dor liggt un de för ’n Artikel relevant is.
  • 1 Punkt je Vulltiet-Anstellten.
• Observatorien sünd jümmer relevant, wenn se opminnst een optisch Teleskop mit en Spegeldörmeter vun twee Meter hebbt.
• Planetarien sünd jümmer relevant, wenn jemehr Kuppel opminnst ’n Dörmeter vun 4,5 Meter hett.
• En Bahnhoff kriggt:
  • 1 Punkt je Bahnstieg, den he hett.
  • 1 Punkt je 10 Johr, in de he Bestand harr.
• Straten sünd jümmer relevant, wenn se
  • Autobahnen oder Bundsstraten in Düütschland, Rieksstraten in de Nedderlannen oder Highways in de USA sünd.
  • de för en Verkehrslast vun mehr as 8000 Fohrtüüch an’n Dag utleggt sünd.
• Ene Brügg/En Tunnel kriggt:
  • 1 Punkt je 20 Meter, de he/se lang is.
  • 1 Punkt je 20 Johr, de he/se Bestand harr.
• Iesenbahn-, Monorail- oder Magnetbahnstreken sünd jümmer relevant, wenn se man opminnst so wiet kamen sünd, dat se dat Boen anfungen hebbt.
• Flooghavens sünd jümmer relevant, wenn se ’n IATA- oder ICAO-Kood harrn.

• En Schipp kriggt:
  • 1 Punkt je 20 Meter, de dat lang is.
  • 1 Punkt je 15 Johr, de dat Bestand harr.
  • 2 Punkt, wenn dat to de Marine vun ’n Staat höört hett.

• Satelliten un Ruumsonden sünd jümmer relevant.

• Planeten sünd jümmer relevant.
• Steerns sünd jümmer relevant.
• Galaxien sünd jümmer relevant.
• Maanden sünd jümmer relevant, wenn se en stabilen Orbit hebbt, de för mehr as 100 Johr Bestand hett.
• Lüttjere natürliche Körper in’n Weltruum sünd jümmer relevant, wenn se en Naam hebbt.

Regel: Bi allens Fiktive gellt de Regel, dat dat Navertellen vun Inholt un dat Beschrieven vun fiktive Charakteristika vun de Saak blots as een Fakt tellt bi de Dree-Fakten-Regel.

Fiktive Universen sünd jümmer relevant, wenn tominnst twee Warken relevant sünd, in de de fiktiven Universen beschreven sünd. Dorbi mutt aver dor op acht warrn, dat keen Artikel över dat Universum schreven warrn schall, wenn disse Artikel licht mit en annern Artikel tohoopbracht warrn kann. To’n Bispeel wenn dat fiktive Universum blots dat Universum vun en enkelte Serie in’t Feernsehn is, denn reckt de Artikel to de Serie un deckt dat Universum mit af.

• Ene fiktive Figur/en fiktiv Oort/en fiktiv Gegenstand kriggt:
  • 1 Punkt je Wark, dat nich to dat sülvige fiktive Universum höört, dat för ’n Artikel relevant is, un in dat op dat Objekt anspeelt warrt.

Regel: Profi-Sport heet hier op disse Siet, dat de Sportlers vun Beroop Sportler sünd.

• Sportlers sünd jümmer relevant, wenn se bi Olympsche Spelen mitmaakt hebbt.
• Sportlers sünd jümmer relevant, wenn se in ene Sportoort, de al mal bi Olympschen Spelen dorbi weer, ’n Weltrekord opstellt hebbt.

• Personen sünd jümmer relevant, wenn se sik ene Sportoort utdacht hebbt, de för ’n Artikel relevant is.

• Sportoorden sünd jümmer relevant, wenn opminnst 50.000 Lüüd dissen Sport utöövt oder de Sport opminnst över ’n Tietruum vun 50 Johren utöövt worrn is.

• Footballspelers sünd jümmer relevant, wenn se opminnst een Lännerspeel maakt hebbt.
• Footballspelers sünd jümmer relevant, wenn se opminnst een Speel in de Bundesliga vun Düütschland maakt hebbt.

Footballverenen sünd jümmer relevant, wenn se opminnst ene Saison in ene Liga weern, in de na de Ligaprinzipien Profi-Football speelt warrt.

• Schachspelers sünd jümmer relevant, wenn se Weltmeester wesen sünd.