The Andromeda Strain (Film)

The Andromeda Strain (op plattdüütsch so veel as „De Andromeda-Stamm“; dt.: Titel: Andromeda – Tödlicher Staub aus dem All) is de Titel vun en Science-Fiction-Film vun Robert Wise ut dat Johr 1971. Dat Dreihbook baseert op en glieknöömten Roman vun Michael Chrichton.

In dat lütte Dörp Piedmont in New Mexico geiht en Ruumsond vun US-amerikaansche Militär daal. Dör en unbekannten Utlöser sünd aver all Inwahners doodbleven, mit Utnahm vun en Söögkind un en Alkoholiker. Ok de Soldaten, de den Opdrag harrn de Kapsel to bargen, blievt doot – jemehr heel Blood stollt in wenige Sekunnen.

Ünner gröttst mööglich Geheemhollen schall nu en Grupp vun Wetenschopplers in’n Opdrag vun de Regeren rutfinnen, wat de Lüüd ümbröcht hett un wat dorgegen doon warrn schall. Veer naamhafte Forschers ut verschedene Fackrebeden warrt dorför in en geheem ünnerirdisch Labor in de Wööst bröcht, dat den Naam „Wildfire“ (Steppenbrand) hett. Dat Labor weer egens för Fäll vun bioloogsche Gefohren inricht un mutt sik nu in’n Eernstfall bewiesen. Ruchweg een Dag vergeiht al mit allerhand Sekerheitsvörgäng un dat Dörlopen vun verschedene Quarantäänstopen.

In de Twüschentiet beraadt dat Militär un de Regeren doröver, wat dat Utbreden vun de Süük mit Nuklearwapen indämmt warrn schall. De Präsident will aver eerst lever 24 bit 48 Stünnen doröver nadneken. Den nächsten Dag aver stört en Militärfleger af, de över dat Rebeet vun New Mexico in Insatz weer. Ogenschienlich hebbt sik an Boord all Polycrondeelen (en gummiordigen Kunststoff) oplöst. Bi’t Ünnersöken vun’t Wrack kummt gau de Verdacht op, dat en Tosamenhang mit Piedmont besteiht. In’t Steppenbrand-Labor kriegt de Forschers dorvun nich mit wegen en technischen Defekt in de Kommunikatschoonsanlaag. Eerst dör en Tofall warrt se later dorvun wies un foddern nu mit Nadruck, dat över Piedmont en Atombomb tünnert warrt, üm dat Utbreden vun de Süük to hinnern.

De Ünnersöken bi Steppenbrand teht sik hen, man opletzt deckt de Wetenschopplers, wat de Oorsaak vun’t Starven in Piedmont is. En eenzelligen Organismus is dorför verantwoortlich, de den Naam „Andromeda“ kriggt. De Organismus is afsluut frömdordig un wiest en kristalline Struktur op, de jede Oort vun Energie verwerten kann. Jem warrt nu kloor, dat en Atombomb jüst dat Gegendeel utlösen de, vunwegen dat de Energie den Organismus ahn Kontroll wassen lett. In’n letzten Moment kann dat Afsmieten hinnert warrn. Bi’t Dörspelen vun verschedene Szenarien in’n Reekner markt de Forschers nu ok, dat Andromeda nich dör Tofall in de Sond kamen is. Dat Militär hett mit Afsicht na butenirdische Organismen söcht, üm op dissen Weg Wapen för de bioloogsche Kriegsföhren to winnen.

Na un na warrt kloor, woans Andromeda funkschoneert. Dr. Hall finnt rut, dat de Organismus nich wassen kann, wenn de pH-Weert to wiet vun’n Normalweert afwieken deit. So is ok to verstahn, worüm de Alkoholiker un dat Söögkind överleven künnen. Man, togliek warrt ok kloor, dat Andromeda sik mit de Tiet muteert is. Jüst as bi’n afstörten Fleger fangt nu ok de Polycron-Dichtungen bi Steppenbanrd an sik optolösen. De Mutatschoon deit de Minschen keen Schaden mehr, man de Zentralreekner stellt de Kontaminatschoon fast un löst dorüm to Sekerheit för de Ümwelt de atomare Sülvsttonichtenmakens-Anlaag ut. Blots Dr. Hall hett den Slötel, üm de Anlaag aftoschalten. Eerst in letzte Sekunn kann he den Nootschalter afstellen. De Andromeda-Organismen, de noch in de Luft sünd drieft op den Pazifik to und warrt dör künstlich tüügten Regen utwaschen. De pH-Weert vun’t Seewater maakt Andromeda tonichten.

De Kritikers hebbt vör allen goot vun den Film schreven: Dat Lexikon vun’n internatschonalen Film beschreev em as en Science-Fiction-Thriller de mit groten technischen Opwand perfekt inszeneert weer^[1]. Vun de Filmbewertungssteed Wiesbaden weer de Produkschoon mit dat Prädikat sünners weertvull uttekent. Adolf Heinzlmeier un Berndt Schulz fünnen den Film in’t Lexikon „Filmen in’t Feernsehn“ ’n beten langatig hebbt em aver 2½ Steerns geven (överdörsnittlich). Se schreven, dat dat de eerste Bio-Katastrofenfilm weer, de vele slechterer Nafolgers harr^[2].

De Film hett keen Priesen wunnen, weer över för veer Utteken vörslahn, dorünner tweemol för den Oscar in de Kategorien Best Szenenbild un Best Snitt.

De Trickeffekten vun den FIlm sünd vun Douglas Trumbull maakt worrn, de dör sien Mitarbeit bi 2001: A Space Odyssey, Close Encounters of the Third Kind un Blade Runner bekannt worrn is. Alleen dat Dorstellen vun den Organismus hett 250.000 US-Dollar köst. Trumbull hett för dit Projekt ok de eerste Reekneranimatschoon maakt, de in en Kinofilm bruukt worrn is. Na den dormoligen Stand vun de Technik is dat dreedimensionale Drahtgiddermodell vun’t ünnerirdische Labor toeerst op’n Drucker utgeven worrn, de denn as bi de Produkschoon vun en Tekentrickfilm na’nanner affotografeert worrn sünd. In’n Film stellt denn de Torüchprojekschoonslienwand en groten Flachbildschirm dor, op den sik dat Vektermodell vun’t Labor langsom dreiht un den Standoort vun de Wetenschopplers mit jemehr Initialen Anwiest.

In de Szeen in’t Krankenhuus, as Dr. Hall För de Steppenbrand-Misschoon afberopen warrt, hett Michael Crichton en Cameo-Optritt as Chirurg. In’t Johr 2008 is en Neeverfilmen vun The Andromeda Strain mit Benjamin Bratt in de Hööftrull un Mikael Salomon as Speelbaas. In Düütschland weer dat Remake eerst 2010 in’t Feernsehn utstrahlt.

Dör de Maandlannen, de eerst kort dorför stattfunnen hett, hebbt de Roman as ok de Film to jemehr Tiet veel Opsehn tüügt un en sünnere Fienföhligkeit för dat Thema utlöst.

• Michael Crichton: Andromeda (Originaltitel: The Andromeda Strain). Düütsch vun Norbert Wölfl. Droemer-Knaur, München 2001, ISBN 3-426-03258-9

1. ↑ CD-ROM-Ausgabe, Systhema, München 1997
2. ↑ Wertung: 2½ Sterne (überdurchschnittlich); Lexikon „Filme im Fernsehen“ (Erweiterte Neuausgabe). Rasch und Röhring, Hamburg 1990, ISBN 3-89136-392-3, S. 42

• The Andromeda Strain in de Internet Movie Database (engelsch)