Australopithecus afarensis
| Australopithecus afarensis | ||||||||||||||
|---|---|---|---|---|---|---|---|---|---|---|---|---|---|---|
 | ||||||||||||||
| Systematik | ||||||||||||||
| ||||||||||||||
| Wetenschoplich Naam | ||||||||||||||
| Australopithecus afarensis | ||||||||||||||
| Johanson, White & Coppens, 1978 |
Australopithecus afarensis (lat.: australis - süüdlich, gr.: pithekos - Aap: Süüdapen vun Afar) is de meist bekannte Aart vun dat Geslecht Australopithecus, dat al lang utstorven is. Düsse Aart hett leevt vör um un bi 4 bit 2,9 Millionen Johren in Oostafrika. Dat weer to de Tieden vun dat Pliozän. 1978 is düsse Aart dat eerste Mol beschreven wurrn vun Donald Johanson, Tim White un Yves Coppens. Vördem weern de Fundstücken to den Meganthropus africanus torekent wurrn. Updeckt wurrn is de Aart al in de 1930er Johren vun Ludwig Kohl-Larsen. De söch in Oostafrika na den Oorminschen un hett dor en Kiffknaken vun den Australopithecus afarensis funnen. He wüss avers nich, wat he dor funnen harr un wat dat bedüden dö.
„Lucy“
[ännern | Bornkood ännern]- → Hööftartikel: Lucy (Australopithecus)
De meist bekannten Fundstücken vun düsse Aart stammt vun „Lucy“ (AL 288-1; AL = „Afar Locality“), de ehrn Ökelnaam vun en Beatles-Song her hett. Lucy weer en ganze fiene un zorte Fro, bloß 1,05 m groot. Ehr Skelett is an'n 30. November 1974 vun Donald Johanson in de Gemarken vun Afar in Äthiopien funnen wurrn. De meisten Forschers nehmt an, Lucy weer en Fro ween, ganz seker is dat man nich. Se is üm un bi 25 Johre oolt ween, as se storven weer un hett vör um un bi 3,2 Mio. Johren leevt.
Liekup-Gahn
[ännern | Bornkood ännern]As dat Skelett vun Lucy unnersocht wurrn is, düch de Forschers dat ganz kloor, dat se liekup gahn weer. Ok Footstappen in de Vulkanasch vun Laetoli in Tansania hefft dat wiest. In dat Johr 2000 sünd de Fundstücken DIK 1-1 vun en Australopithecus-Deern vun 3 Johren unnersocht wurrn. Düsse Fundstücken dreegt den Naam Dikika Girl (na den Fundoort) oder ok Selam. Dor is bi rutkamen, dat se liekup güng, man ok, dat tominnst junge Australopithecinen sik dör de Twiegen un Äst vun de Bööm dörhangeln konnen, just so, as dat vundagen de Schimpansen maakt.
Literatur
[ännern | Bornkood ännern]- D. C. Johanson, T. D. White un Y. Coppens: A New Species of the Genus Australopithecus (Primates: Hominidae) from the Pliocene of Eastern Africa. Kirtlandia Nr. 28 (1978)
- D. C. Johanson un Maitland Edey: Lucy - Die Anfänge der Menschheit. (Dt. Utgave), R.Piper & Co. München 1982, ISBN 3-492-02738-5
- Yves Coppens: Lucys Knie - Die prähistorische Schöne und die Geschichte der Paläontologie, München, 2002
Weblenken
[ännern | Bornkood ännern]- http://www.wissenschaft.de Footsporen wiest: Australopithecus afarensis is al vör 3,5 Millionen Johren liekup lopen (hoochdüütsch)
- Entwicklung des Menschen - Steht die Wiege der Menschheit noch in Afrika? (Landschaftsmuseum Obermain)