Synnøve Solemdal

Synnøve Solemdal leevt in Lillehammer un hör Vereen is Tingvoll IL. Biathlon bedrifft se siet 2002, siet 2008 hörrt se to den norweegschen Natschonalkader.

Se leep hör eerste Junioren-Weltmeesterschap 2008 in Ruhpolding. In de dree Eenzelrennen keem se jewiels ünner de best 20, en 12. Platz in' Sprint weer dorbi dat best Resultat. Mit de Staffel, to de ok de Süsters Ada un Elise Ringen hörrn deen, wunn se achter dat düütsch Team de Sülvermedaille. Mal afsehn vun Platz 11 in' Sprint reckt se bi de Junioren-WM 2009 in Canmore blots eenstellig Ergevnisse, dorünner en fievten Platz in' Sprint. Noch spoodrieker weer Solemdal bi de Junioren-Europameesterschap in dat glieker Johr in Ufa. Se verpass woll weer as 17. in' Sprint de Top-Ten, wat se aber in de folgen Rennen henkreegen hett. In' Eenzel wunn se achter Olga Wiluchina ut Russland de Sülvermedaille. Bi de Junioren-Weltmeesterschapen 2010 in Torsby, leep dat ähnlich. In' Eenzel keem se blots up Rang 22, wunn aber jewiels de Bronzemedaille in' Sprint achter Maren Hammerschmidt un Sophie Boilley un in de Verfolgung achter Boilley un Anastassija Kalina un mit Kaia Wøien Nicolaisen un Marie Hov in dat Staffelrennen Sülver. Bi de Biathlon-Europameesterschapen 2010 in Otepää wurr Solemdal Fievte in' Eenzel, in' Sprint Darte achter Tiril Eckhoff un Kalina un wunn de Goldmedaille in de Verfolgung.

Bi de Fruen is Solemdal all siet 2008 antreeden. Hör eerst Rennen hett se to'n Anfang vun de Saison 2008/09 in Idre in' Rahmen vun den IBU-Cup bestreeden. In hör eerstr Sprint keem se man blots up den 57. Platz, leep aber ansluutend in dat Verfolgungsrennen bit up Platz fiev vör. Nah hör good Ergevnisse bi de Junioren-WM un EM drüff Solemdal in Trondheim eerstmals in' Biathlon-Weltcup antreeden. Bi hör eerst Sprint verpass se dat Verfolgungsrennen as 61. blots um een Platz. Beter leep dat een Week later bi dat Saisonfinale in Chanty-Mansijsk. As 34. vun den Sprint hett se sück nich blots för den ansluuten Verfolger qualifizeert, sonnern wunn ok hör eerst Weltcuppunkte. Hör eerst internatschonale Meesterschap bi de Fruen wurrn de Biathlon-Weltmeesterschapen 2011 in Chanty-Mansijsk. In' Eenzel belegg se den 63. Platz, wurr 43. in' Sprint un hett dat Verfolgungsrennen as överrund Löperin nich to'n Enn' brocht. In de Staffel wurr se as Startlöperin insett un reck mit Ann Kristin Flatland, Fanny Horn un Tora Berger Platz fiev. Nahdem se sück siet de Saison 2008/09 immer mehr in' Weltcup verbetern un fastsetten kunn, schaff se hör endgültigen Dörbröök in de Saison 2011/12, as se in dat eerst Saisondrittel ünner annern twee Top-Ten-Platzierungen recken dee. In dat Verfolgungsrennen bi den Weltcup in Hochfilzen 2012 fier Synnøve Solemdal hör eerst Sieg in en Weltcup-Rennen. In den vörhergahn Sprint harr se Platz 4 beleggt.

Nah den Olympisch Winterspelen 2014, wo se in' Sprint Platz 35 un in de ansluuten Verfolgung Platz 36 belegg, wurr bi Solemdal Mononukleose faststellt un se muss doruphen de Weltcuppsaison 2013/14 vör de Tiet afsluuten^[1]

In de Saison 2014/15 gung se aber weer an den Start, kunn aber nich an hör biterherig Erfolge anknütten. Blots in twee Rennen keem se in de Punkteränge, und keem deelwies ok blots in den IBU-Cup to’n Insatz. Neben de körperlich Leistungsfähigkeit wurr ok noch hör Scheeten in‘ Vergliek to de Vörsaison um 13% schlechter.

De Saison 2015/16 leep denn weer beter. Synnøve Solemdal kunn weer as plaant traineeren. Ok de Rennergevnisse deen sück wat verbetern, mit dree Utnahmen keem se jewiels in de Punkteränge. Ok de Scheetergevnisse weern weer beter. Bi hör Heim-WM an‘ Holmenkollen in Oslo wunn se gemeensam mit Fanny Horn Birkeland, Tiril Eckhoff un Marte Olsbu Gold in dat Staffelrennen. Solemdal bleev as Startlöperin an‘ Scheetstand ahn Fehler un övergeev mit good 13 Sekunnen Rückstand up de to de Tiet führen Kaisa Mäkäräinen an hör Teamkollegin Birkeland.

In de Vörbereiten up de Saison 2016/17 muss Solemdal en wiederen swooren Rückslag hennehmen. Se kunn wiels den Training ehrn Körper nich richtig belasten, in disse Tiet weer hör dat blots mögelk, wenige un kört Eenheiten to traineeren. As sück in‘ Juli kien Betern instellen dee, hett se dat Training instellt. Bit November geev dat kien Verklooren för hör körperlich Verfaaten, ofschons se Dokters, Psychologen un Physiotherapeuten ahn Spood upsöcht harr. Eerst gegen Enn‘ November keem en Dokter up de richtige Diagnose. Nah en Zeckenbeet, den se sück vermootlich bi en Besöök bi hör Familie in Tingvoll totrucken harr, wurr se an Lyme-Borreliose krank. Sie harr all doröver nahdocht, hör sportlich Loopbahn aftosluuten, nah en Behanneln mit Antibiotika kunn se aber nah weniger as veer Week weer mit dat Training anfangen. Nah en länger Upbauphase hett se bi den IBU-Cup in Brezno hör eerst internatschonal Rennen nah meest een Johr Paus bestreeden. Nahdem se ok an den IBU-Cup in Kontiolahti deelnommen harr, kehr se een Week later – ebenfalls in Kontiolahti – in den Weltcup torüch. Se hett dorbi Sprint un Verfolgung knapp buterhalv vun de Punkteränge afslooten. Solemdal geev an, nu kumplett gesund to ween un wull sück nu up de Olympisch Winterspelen 2018 vörbereiten.^[2]

Nah dat Enn'n vun de Saison 2019/20 hett se hör Loopbahn afslooten.

• Synnøve Solemdal in de Datenbank vun de IBU (engelsch)

1. ↑ Synnoeve Solemdal (NOR) an Mononukleose erkrankt biathlon-online.de, afropen an' 24. März 2014
2. ↑ Solemdal fikk sesongen ødelagt av flåttbitt up vg.no, afropen an‘ 2. Mai 2017