Heinrich Burmester

Franz Joachim Heinrich Burmester (* 10. November 1839 in Niendörp; † 24. April 1889 in Boizenborg) weer en plattdüütschen Schriever.

Burmester is 1839 in Niendörp as Söhn vun en Buurn boren un güng dor ok op de Volksschool. Denn weer he op dat Lehrerseminar in Ratzeborg. He is bi de Vörschool vun dat Ratzeborger Gymnasium anstellt worrn, güng denn aver ut finanzielle Grünn na Hamborg. Dor hett he an Privatscholen Ünnerricht geven un en Lehrerkurs op dat akadeemsche Gymnasium besöcht. He hett denn in’n Harvst 1863 en Philologie-Studium in Kopenhagen anfungen. Vörjohr 1864 güng he na Jena un in’n Harvst an de Universität Kiel. Dor wesselt he denn vun Philologie na de Juristeree. Vun Vörjohr 1867 af an is he denn as Huuslehrer in Mekelborg un Loonborg ünnerwegens. Denn füng he as Korrektor bi’n Altonaer Merkur an. Dor sünd ok siene eersten plattdüütschen Saken rutkamen. As dat Blatt pleite geiht, güng he en Tiet as Filzpantüffelmaker na Loonborg. Karl Theodor Gaedertz harr wat vun Burmester sien plattdüütsche Schriften leest un haal em denn na Berlin un hett em Arbeit bi en Afkaat vermiddelt. Later harr he anbaden kregen, dat he dat Leid över de Lauenburger Landeszeitung övernehmen schull. He hett sien Anstellung in Berlin opgeven un güng ahn Verdrag na Loonborg. Doch welk Lüüd wullen em nich op dissen Posten sehn un Burmester kreeg em nich. He weer noch en ganze Tiet vör Gericht in Striet wegen de Saak un is denn 1889 bi Loonborg in’e Elv in’t Water gahn.