Mineraalwaeter

Mineraalwaeter is waeter daoras mineralen in zitten die et waeter een specifieke smaek geven. Zolten, zwevelverbiendings en gassen bin veurbielden van stoffen die in zok waeter opelost bin. Mineraalwaeter hej zowal zonder as mit (koolzoer)gas; in et leste geval is der spraoke van sodawaeter, gazeuse, broeswaeter of spuitwaeter.

Van mineraalwaeter wodt vanolds emiend dat et geneeskrachtige eigenschoppen hef. Vrogger reisden meensen naor bronnen toe om et veur de gezondheid te drinken. Bi'j de bronnen ontstunden vaeke kuuroorden, mor daor gonk et meer om baden as om drinken. Joe in mineraalwaeter baden om therapeutische redens wodt balneologie enuumd.

Mineraalwaeter om te drinken wodt vandaege de dag in flessen verkocht en kuj haoste overal kriegen. Over de hiele wereld bin der meer as vierduzend marken mineraalwaeter in de haandel; in Nederlaand en België bin ze et best in de kunde mit Spa, uut België. In Nederlaand wodt 'spa' vaeke gebruukt om mineraalwaeter in et algemien mit an te duden (en te bestellen). Mit 'spa rood' kriej dan broesend mineraalwaeter, en mit 'spa blauw' mineraalwaeter zonder gas.

Soms wodt de term 'mineraalwaeter' infermeel gebruukt veur koolzoerholdend flessenwaeter dat niet uut een mineraalholdende bron ofkomstig is. Der wodt dan ok vule waeter as 'mineraalwaeter' an de man ebracht intied dat et niet (biester) mineraalriek is. Veur de EU is mineraalwaeter 'bacteriologisch gezond waeter mit as oorsprong een waetervlak of ondereerdse laag, ofkomstig van een bron die exploiteerd wodt deur ien of meer netuurlijke of keunstmaotige ontspringingspunten'.

Krek as leidingwaeter (dat uut de kraene komp) kan mineraalwaeter verontreinigd wezen deur bestriedingsmiddels die ze in de laandbouw gebruken, deur keunstmaotige zuutstoffen en deur medesienen. Via oppervlaktewaeter kunnen disse stoffen in et eerdoppervlak dringen en bronnen versmeren.

Dit stok is eschreven in et Stellingwarfs van de Kop van Overiessel.