Баклава

Баклава
Баклава

Парчиња баклава во триаголен облик
Дел од оброкот	десерт
Место на потекло	Отоманско Царство[1]
Регион	Балкан, Близок Исток, Кавказ
Главни состојки	кори, ореви, засладувач
Варијанти	повеќе

Баклава (турски: baklava) — вид многу сладок десерт. Баклавата всушност претставува слатка пита што може да има и до 70 тенки кори. Таа потекнува од просторите на поранешното Отоманско Царство и денес се приготвува во земјите наследнички. Оттука, десертот се среќава во македонската, црногорската, босанската, српската, бугарската, грчката и турската кујна. Баклавата во минатото се приготвувала исклучиво во домаќинствата или слаткарниците, но денес може да се најде и во продавници и самопослуги како полуиндустриски производ.

Историчарот Паул Д. Буел тврди дека поимот „баклава“ најверојатно потекнува од монголскиот збор „бајла-“ со значење „врзува, обвиткува“ и туркискиот глаголски завршеток „-в“;.^[2] всушност, зборот „бајла-“ се среќава во туркиските јазици како позајмен збор.^[3] Ерменскиот јазичар Севан Нишанјан смета дека најстарите називи на десертот биле „баклаги“ и „баклагу“ потекнувааат од времето пред 1500 година и имаат пратурско потекло.^[4] Друг облик на поимот исто така се среќава и во персискиот јазик како „баклаба“ (باقلبا).^[5] Иако наставката „-ва“ укажува на можно персиско потекло,^[6][7] делот „бакла-“ не е персиски и неговото потекло останува неразјаснето.^[8]

Арапскиот назив „баклава“ (بقلاوة) веројатно потекнува од турскиот јазик.^[9]

Историјата на баклавата не е доволно документирана, но нејзиниот денешен облик се претпоставува дека се појавил во царските кујни на Топкапи-сарај во Истанбул.^[10] Султанот ги послужувал јаничарите со баклава секој 15. ден од рамазанскиот пост на свеченост наречена „баклавска поворка“ (Baklava Alayı).^[11][12]

Постојат три предлози за предотоманско потекло на баклавата: римската плацентна торта којашто била застапена во византиската кујна,^[13] средноазиската турска традиција на приготвување повеќеслоести лебови^[14] и персиското јадење „лаузаинак“.^[11]

Баклавата обично се приготвува во големи плехови. Во плехот се поставуваат повеќе слоеви на кори кои се раздвоени со растопен путер и растително масло. Слој од ситно сецкани ореви (понекогаш и лешници или ф'стаци) се поставува на врвот, а потоа истиот се покрива со повеќе слоеви на кори. Најголемиот број рецептi се состојат од повеќе слоеви на кори и ореви, иако кај некои се среќава само по еден слој ореви меѓу два дела од кори.

Пред печење на температура од 180 °C во времетраење од 30 минути, тестото се расекува на повеќе парчиња, кои најчесто се во облик на паралелограм, триаголник, делтоид, правоаголник или квадрат. По печењето, баклавата се посипува со сируп од мед, розова или портокалова вода и се остава течноста да ја впие.

Баклавата обично се послужува на собна температура со парчиња јаткасти плодови.

• 
  Триаголно парче баклава
• 
  Баклава со лимон
• 
  Слоеви на баклава
• 
  Баклава со ореви и лешници
• 
  Баклава со мед и ореви

• Кори
• Тулумба
• Кадаиф

• Рецепт за турска баклава Архивирано на 28 август 2008 г. — Крстарица
• Рецепт за турска баклава — Балканска кујна
• Рецепт за баклава — Рецепти