Segunda Curinz Capitel Ses

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

¹E intanta che laurum insèma, anca esurtum che vialter ricevii la grazia de Diu no vanamént: ²già che 'l dis:
«A un mumént cetabil t'huu sentii,
e in del dì de la salvéza t'huu jütaa».
Varda adèss el témp cetabil, varda adèss el dì de la salvéza!
³Dand nissüna causa de scarpüsc in de nagott, perchè 'l ministéri el sia no biasmaa. ⁴Ma recumandumm in de tüsscuss cumè ministér de Diu, in de tanta perseveranza, in di tribulaziún, in di necessitaa, in di afliziún estremm, ⁵in di bott, in di presún, in di instabilitaa, in di travaj, in di perd al sögn, in di digiún, ⁶in de püritaa, in de cugnussénza, in de paziénza, in de gentiléza, in del Spirit Sant, in del bén sénza ipucrisìa, ⁷in d'una parola de la veritaa, in de la puténza de Diu; per mèzz di arm de la giüstizia, de la driza e de la manzina^[1], ⁸per mèzz de gloria e desunúr, per mèzz de fama cativa e bon report; cumè impustúr e vér, ⁹cumè no cugnussüü e bén cugnussüü, cumè dree a murì e, varda, vivum, cumè castigaa ma no metüü a mort, ¹⁰cumè faa trist e semper gh'èmm letizia, cumè pòr ma fasend sciúr tant personn, cumè avendugh nagott e tegnend tüsscoss.
¹¹La nostra buca l'ha dervii per vialter, Curinz, el noster cör l'è slargaa: ¹²sii minga schisciaa in de nümm, ma sii schisciaa in de la vostra cumpassiún; ¹³e al medemm cuntracambi, disi cumè a bagaj, duarìuv vèss slargaa anca vialter.
¹⁴Sarìuv no metüü insèma suta un giuv divèrs cun quij che creden no: già che qual report el gh'è intra la giüstizia e l'iniquitaa? O quala fradelanza la gh'è intra la lüs e 'l scür? ¹⁵E qual'armonia la gh'è intra Crist e Beliar, o quala part la gh'è intra una persona fedela cun vöna che la cred no? ¹⁶E qual acordi 'l gh'è intra 'l témpi de Diu e i idul? Defàtt, nümm sèmm el témpi de Diu vivént, cumè Diu l'ha dii:
«Staruu de cà intra lur e cun lur caminaruu,
e saruu 'l lur Diu,
e lur sarànn la mia gént.
¹⁷Dunca, andii via del mèzz de lur
e che siuv separaa föra, el dis el Signúr,
e tuchee no una cossa impüra;
e mì ve ricevaruu,
e saruu a vialter un pader,
e vialter sarii a mì fiöö e tús,
el dis el Signúr ogniputént».

1. ↑ o sinistra

• ← Indree a Capitel Cinch
• Inanz a Capitel Sett →
• A l'indes