Rumàn Capitel Sedes

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

¹E ve recumandi Febe, nostra surèla, che l'è minister^[1] de la gésa che l'è a Cencrea, ²perchè la ricevuv in del Signúr degnamént di sant e ghe presentuv^[2] in de qualsessìa roba la gh'avarà besògn; già che anca lee l'è devegnüda patrunèssa^[3] a tant personn e anca a mì medemm.
³Salüdee Prisca e Aquila, i mè cumpagn de laur in del Crist Gesü, ⁴che hann metüü giò 'l lur propi coll per la mia vita, che ringrazi no dumà mì ma anca tücc i gés di naziún, ⁵e la gésa arént la lur cà. Salüdee Epenet el mè predilètt, che l'è la primizia de l'Asia^[4] per Crist. ⁶Salüdee Maria, che l'ha travajaa tant per vialter. ⁷Salüdee Andronich e Giünia, i mè parént^[5] e cumpagn de presún, che hinn famús intra i apostuj, che anca hinn staa in del Crist prima de mì. ⁸Salüdee Ampliat, el predilètt in del Signúr. ⁹Salüdee Ürbán, el noster cumpagn de laur in del Crist, e Stachi, el mè predilètt. ¹⁰Salüdee Apele, el pruaa in del Crist. Salüdee quij che hinn de la cà^[6] de l'Aristobul. ¹¹Salüdee Erodiona, mia parénta. Salüdee quij che hinn de la cà del Narciss che hinn in del Signúr. ¹²Salüdee Trufaina e Trufosa, che hann travajaa in del Signúr. Salüdee Persid, la predilèta, che l'ha travajaa tant in del Signúr. ¹³Salüdee Rüf, el scernii^[7] in del Signúr e sua mader e mia. ¹⁴Salüdee Asincrit, Flegon, Erme, Patroba, Erma e i fradèj cun lur. ¹⁵Salüdee Filolog e Giülia, Nerea e sua surèla, e Olimpa e tücc i sant cun lur. ¹⁶Salüdeev el vün i alter cunt un basín sant. Ve salüden tücc i gés del Crist.
¹⁷E v'esurti, fradèj, a vardàv de quij che fann i diséns^[8] e i scanduj^[9] cuntra l'insegnamént che vialter avii imparaa, e giree via de lur; ¹⁸già che taj personn serven minga 'l noster Signúr Crist ma la sua propia panscia, e buzaren i cör di sémpliz per mèzz del parlà margniff e de l'insaunà^[10]. ¹⁹Già che la vostra übediénza l'è devegnüda cugnussüda a tücc; dunca, gh'huu letizia per vialter, e vöri che vialter siuv savi vèrs el bun, e inucént vèrs el maa. ²⁰E 'l Diu de la pas el schisciarà sveltamént el Satana suta i voster pee.
²¹Timotee, el mè cumpagn de laur, el ve salüda, e Lüci, Giasun e Sosipater, i mè parént. ²²Mì, Terzi, che huu scritt chèsta lètra, ve salüdi in del Signúr. ²³Gaj, el mè ospit e chèll de l'intréga gésa, el ve salüda. Erast, l'aministradúr de la citaa, el ve salüda, e Quart, el fradèll.^[11]
25E a lü che l'è capaz de stabilìv segund el mè vangel e la predicaziún del Gesü Crist, segund la revelaziún del ministeri che l'è staa segrett per tant sècuj, ²⁶e adèss l'è staa faa manifést per mèzz di Scritür prufetegh segund el cumand del Diu etèrn a l'übediénza de la féd, e faa savüü a tücc i naziún, ²⁷al Diu sull savi, per mèzz del Gesü Crist, al qual la sìa la gloria per semper, amén.

1. ↑ o diacunèssa
2. ↑ o assistuv
3. ↑ o jütanta
4. ↑ l'è de dì, Türchia ucidentala
5. ↑ o cumpagn de tèra, anca in de 11 e 21
6. ↑ el test grech el manca de la cà, anca in de 11
7. ↑ o elètt
8. ↑ o divisiún
9. ↑ o scapüsc
10. ↑ o adülà, incensà
11. ↑ el 24 l'è prubabilamént giüntaa a l'uriginal: Che la grazia del noster Signúr Gesü Crist la sìa cun tücc vialter, amén. Inscì hinn anca i 25-27.

• ← Indree a Capitel Quindes
• Inanz a Prima Curinz Capitel Vün →
• A l'indes