Haakon Magnus er kronprins i Noreg. Han er sonen til kong Harald 5. og dronning Sonja. Haakon Magnus er gift med kronprinsesse Mette-Marit.
Kronprins Haakon er først i arverekkja til den norske trona. Det betyr at han blir konge, når kong Harald døyr eller sluttar å vere konge.
Då kronprinsen vart fødd, fortalde foreldra at han til dagleg skulle bruke namnet Haakon. Han vaks opp på Skaugum i Asker, med foreldra og storesøster Märtha Louise.
Han gjekk på barne- og ungdomsskule på Smestad skole i Oslo. Vidaregåande skule tok han på Kristelig Gymnasium i Oslo.
Haakon vart kronprins i 1991, då bestefaren kong Olav 5. døydde og Harald vart konge.
Kronprins Haakon gifta seg med Mette-Marit Tjessem Høiby i 2001. Saman har dei barna prinsesse Ingrid Alexandra og prins Sverre Magnus. Kronprinsesse Mette-Marit har éin son frå før, som heiter Marius Borg Høiby.
Kronprins Haakon har utdanning både frå militæret og universitet. Han er utdanna offiser i Marinen. Han har studert på universitetet i California i USA, og på Universitetet i Oslo. Han har også studert internasjonale spørsmål og politikk i London i Storbritannia.
Kronprins Haakon har fortalt at han ikkje var heilt sikker på om militæret passa for han. Han synest det var dumt å trene på å drepe. Han snakka mykje med far sin om dette, før han byrja på den militære utdanninga. No synest han det er bra at Noreg har eit forsvar. Som kronprins er han general i Hæren og Luftforsvaret, og admiral i Sjøforsvaret.
Haakon er interessert i internasjonale spørsmål, særleg i miljø og klima. Han har jobba for FN og reist til mange land i Afrika og Asia for å bidra til å nå måla til FN.
Stortinget endra Grunnlova i 1990 slik at både kvinner og menn kan bli monark i Noreg. Men det gjaldt ikkje barna til kong Harald, som var fødde før endringa. Derfor er Haakon tronarving, sjølv om søstera er eldst.
Haakon Magnus har lært om å vere konge både frå faren og farfaren sin. Kronprins Haakon har vore med på dei faste møta kongen har med regjeringa kvar veke, sidan han fylte 18 år. Han har òg leidd møta, for eksempel når kongen har vore sjukmeldt.
Kronprins Haakon likar friluftsliv, skisport og surfing. Han har hytte både på fjellet og ved sjøen, der familien ofte er i feriane.