Adam Mickiewicz

Adam Mickiewicz

Dæti personâli

Nàscita: Zaosie, 24 dexénbre 1798
Mòrte: Istanbul (Costantinopoli), 26 novénbre 1855
Pàize: Polonia

Âtre informaçioìn

Profesción: Poeta

Adam Bernard Mickiewicz (Zaosie, 24 dexénbre 1798 - Costantinopoli, 26 novénbre 1855) o l'è consciderao o ciù illustre poeta polacco.

Adam Mickiewicz o l'è nasciuo o 24 dexénbre 1798 a Zaosie, vexin a Nowogródek, l'antico Gran Ducato de Lituania da 'na famiggia d'antiga lignœua, ma aroinaa. A so formaçion colturâ, de tipo clascico, a l'è stæta completaa a l'Universcitæ de Vilnius da-o 1815 a-o 1819. Da-o 1819 a-o 1823 o l'eserçitò l'attivitæ de professô a Kowno.

Doppo d'esise interessao a-i filosofi françeixi illuministi comme Voltaire, fito o començò a apascionâse a-i capolavoî di gren scritoî romantichi Schiller e Byron.

A Vilnius o s'afiliò a-e societæ studentesche di "Filomati e Filareti". Fortemente critico in raporto a o "paterno abraçço" ruscio insci-o regno polacco, into 1823 o fu arestao da-a poliçia ruscia con di atri acolliti da mæxima associaçion. O fu imprexonao pe quarche meize e o no tornò mai ciù inte sœu tære. O visse quindi a Odessa, Mosca e San Peoburgo, strenzendo di ligammi con numeroxi scritoî rusci, tra-i quæ Alexandr Pushkin.

Comme poeta o començò a arecœugge i primmi sucesci con l'oppia Ballady i romanse (Ballate e Romançe) do 1822 ch'a l'arve l'etæ romantica inta lettiatua polacca. A prefaçion de l'oppia a l'è una fotografia insci-a lettiatua de l'Europa ocidentâ.

Tra-o 1822 e-o 1832 o compoze l'oppia tiatrâ Dziady (Gli Avi), inta quæ o conferì a-a Polonia un rollo de goidda pe-i atre naçioin europee. O tittolo de l'opera o vegne da 'n'antiga festa popolâ bieloruscia, chi ha lœugo durante a festa de Tuttisanti; de celebraçioin a-e quæ o Mickiewicz o parteçipava durante a so zoeneçça in Lituania. A segonda parte a descrive e soferençe tereñe, prezentando di fantasmi de gente mâtratæ, di figgiœu che no pœuan razonze o paradizo perché no han soferto insci-a tæra e de contadiñe vergini che no han mai sperimentao ni l'amô, ni e sœu soferençe. A terça parte a presenta o martœuio da Polonnia e a presenta 'na vixon do futuo da naçion, inta quæ e soferençe son paragonæ a-a Pascion de Criste. Questa vixon a se concludde co-a profeçia de 'n misteriozo mescîa da Polonnia de nomme "44". A quarta parte a l'è un monodramma. O protagonista o l'è o spirito de 'n zoeno suicidda, consumao da-a pascion ch'a l'ha portao a-a follia e poi a-a morte.

Durante o so exillio Mickiewicz o l'ha scrito tra-i atri Konrad Wallenrod (1828), un poema filosofico ch'o l'ha inspiao a zoentù polacca inta lotta contra l'oprescion. Inte quest'oppia un Meistro Lituan de l'Orde Teutonnego o demolisce e sœu attivitæ.

Into 1825 Mickiewicz o s'atrœuva inta Crimea e o pubblica a so oppia erotica Sonety krymskie (Sonetti de Crimea, 1826). Sci ben inspirao da-o panoramma da steppa, a so annima e a so mente son sempre ciù asciorbie da-i sœu sentimenti naçionalisti. Ma l'oppia, a ciù importante pe-i polacchi a l'è Pan Tadeusz (Segnô Tadê) - un poemma de 12 libbri, ciamao "epopea naçionâ".

Adam Mickiewicz o l'ha ascì traduto in polacco i oppie di aotoî italien: Françesco Petrarca e Dante Ardighê.

• Wikimedia Commons a contêgne di files in sce Adam Mickiewicz