Lourdesgrot

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

'n Lourdesgrot ies 'n replica van de grot van Lourdes in Zuud-Frankriek. Op dees plek, gelege aan de rivier de Gave, zou Maria, mèt in häör heng 'ne roazekrans, in 1858 in totaal 18 kièr versjene zin aan aan de 14-jaorige meulenaersdochter Bernadette Soubirous.

Op diverse plaatse zint in de jaore daonao, in de loup van de 20e ièw, ter ière van dees gebeurtenis en ouch um de luuj dit fenomeen get korter bie te bringe, miè van dit soort grotte oetgekap of opgeboewd. Ein van de groater exemplare ies de Lourdesgrot in Valkeberg, in 1927 geboewd. Dao ies gebruuk gemaak van de mergelwand van de Gemeintegrot aan de Cauberg. De oetveuring ies op dezelfde sjaal es de echte grot in Lourdes.
Lourdesgrotte en grötsjes woorte ouch dèks gemaak in kloastertuine.

Lourdesgrotte in Nederlands Limburg

Lourdesgrot in Banholt, Maria mèt roazekrans

in Banholt tegeneuver de kèrk
in De Kling bie de ouw parochiekèrk van Merkelbeek
in Eijsde in 't Ursulinepark
in De Hei, gemeinte Ech-Sustere
in Holset
in Mariaroa (Heerle)
in Mofert bie 't Kloeaster
in Nieswiller bie Kesjtièl Nieswiller
op Sint-Pieter bie Mestreech
in Steyl
in Tienray (weurt "Klein Lourdes" geneump)
in Valkeberg aan de Cauberg
in Vaols, mèt kruusweegpark en calvarie
in Wienesrao achter 't kesjtièl
in Zumpelveld

Lourdesgrotte in Belsj Limburg

in Lommel (Mariapark in Lommel-Fabriek)
in Munsterbilze
in Schootsheide bie Nerotere
in Wimesmier (Wiemesmeer) bie Zutendaal: 'n Lourdesgrot, de 14 sjtaties en Roazekranskapelkes in 'n aangelag park.

Kortbie de Limburge

Klein Lourdes (Petit Lourdes) liek in Bitsinge (Bassenge). De Lourdesgrot bevingk ziech hie in e wandelpark mèt 'ne kruusweeg mèt 14 kapelle en daoneve ouch nog 'ne roazekransróndgank mèt 14 kapelle.
In Rukkelinge-aan-de-Jeker neve de dörpskèrk, e kleiner veurbeeld.