Gitanas Nausėda

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Gitanas Nausėda (Klaipėda, 19 mei 1964), dèks verwesterd es Gitanas Nauseda, is 'ne Litouwsen ikkenemis, polletieker en baankeer dee allewijl de prizzedent vaan Litouwe is (sinds 2019) oonder 't premiersjap vaan Ingrida Šimonytė. In tegestèlling tot de meiste EU-lidstaote (wie Nederland, Belsj en Duitsland) is neet 't regeringshoof (de premier) mer 't staotshoof de mechtegse polletieker vaan 't land. Nausėda waor d'n direktäör vaan de Monnetaire Policy vaan de Baank vaan Litouwe vaan 1996 bis 2000 en de hoof ikkenemis vaan de veurzitter vaan SEB bankas vaan 2008 bis 2018.

In april 2020 hadde prizzedent Nausėda en de Belarössische prizzedent Alexander Loekasjenko de ierste polletieke tête-à-tête in tien jaor tied. Es gevolg vaan Loekasjenko ziennen hellen hand tege de proteste in zie land (es gevolg vaan de oonierleke verkezinge dao in 2020, vluchde de Belarössische oppositiekandidaot Svetlana Tikhanovskaja nao Litouwe. Op 12 augustus 2020 besloot Nausėda de landsgrenze gans ope te zètte veur Belarössische vlöchtelinge. Nausėda zie leiersjap gedäörende die crisis woort in de Europese Unie (EU) gezeen es 'n positie die wied bove de verwachtinge oet kaome die lui hadde vaan 't klein lendjse.

Heer kaom in 2013 in opspraok umtot heer e privéhoes leet bouwe in 't Regionaol Park vaan Pavilniai, wat al oonder de Sovjet-Unie in 1974 waor oetgerope tot natuurlek monumint. Op force vaan juridische experts had Nauseda dat hoes gaaroet neet mage bouwe. De rechter goof Nauseda evels geliek. D'n direktäör vaan 't regionaol park neumde 't e sjandaol veur 't Litouws rech.