Amstel Gold Race 2019

 

De ciefers correspondere mèt 't nevestoond keertsje.

De koers góng vaanaof de Vriethof in 't centrum vaan Mestreech iers nao 't noorde, euver Bun en Gäöl, um daan d'n Hussenberg (1) te beklumme. Daan góng 't in oosteleke riechting nao Beek; daan nao 't zuie euver Groet Genhout (2) tot bij Meerse, boe vaanaof Raor (3) obbenuits woort geklomme. Vaan hei góng 't ooswaarts via Groet Haasdal en Hölsberg nao Voelender, boe me rechs aofsloog nao Ubachsberg (4). Nao dat dörp góng 't globaol weer umlieg, tot me bij Sjin de Geulbèdding bereikde. Bij Valkeberg góng 't umhoeg nao Sub (5); daan weer umlieg, boenao veur d'n ierste kier de Cauberg woort beklomme (6).

Nao d'n ierste kier Cauberg góng 't weer umlieg nao Houtem; vaan dao-oet góng de koers euver Geulem op de Geulemerberg weer nao bove um bij Berg (7) bovenaon te koume. Via de groete weeg zakde de renners daan tot in Sjaan. Vaan dao góng 't in zuieleke riechting en steeg me laankzaam bij Ikkelder en Sint-Geerte. Daan góng 't eve nao 't weste tot 't Mariadörp bij Eisde. Euver Misj en de Misjerhei (8,9) góng 't daan kort laanks de Belzje grens nao Mheer. Veurbij Norbeek góng 't daan nao Hoegkruus (10), daan via Slenaoke euver de Loorberg (11) nao Heieret. Daovaandan góng 't nao de Gulperberg (18); umtot me op 't plateau blijf, is dit evels gein beklumming. Me góng daonao bergaof riechting Partij en daan bij Mechele (12) weer umhoeg. Op de Eperhei góng 't mèt 'ne sjerpen drej nao Epe en Kamerig (13). Daan daolde me nao Viele, om vervolgens bij Vaols de Vaolzerberg (14) gans op te klumme.

Nao 't hoegste punt vaan Nederland góng me kort 't Belsj in, meh bij Wolfhaag (15) staok me de grens weer euver. Via Raore góng 't euver de hendeg steil Epenerbaan (16), daan trök euver Kamerig, Epe, Epenerhei en Partij nao de Gölpenerberg (18). Me daolde daan aof nao Gulpe, boenao 't weer umhoeggóng (19) riechting Eys. Via Trintele (20) góng 't umlieg nao Sumpelveld; vaanoet dat dörp steeg me nao De Huls (21). 't Góng daan nao Ubachsberg; kort denao góng 't weer umhoeg (22). Daan zoch 't parcours obbenuits 't Geuldaal op en góng de koers weer umhoeg euver de Subberberg (5) en de Cauberg (6). Ouch de route nao Houtem, Berg (7) en Sjaan waor dezelfde wie iers.

Noe evels bleef 't peloton laanger in Mestreech en góng 't ouch door Hier. Daan góng me weer klumme: iers ooswaarts nao Keer, daan noordelek op de Biemelerberg (26). Wie me dao waor gewees, hóbbelde me get in zuidzuidoosteleke riechting nao Slenaoke. Zjus wie ieder góng 't ouch noe euver de Loorberg (11); noe evels fietsde me d'n aandere kant op, direk nao de Eperhei en daan noordwaarts nao Mechele (12). Vaanoet Partij woort weer de Gulperberg beklomme (18); dee woort dus veur d'n daarde kier aongedoon meh pas veur d'n twiede kier bestege. De route nao en door Gulpe waor ouch identiek aon de veurege kier; daonao evels weurt Eys bereik vaanoet Wahlwiller (29). Vaanoet dat dörp stijg me nao Elkerao (30), daan nao de Fromberg (31). Daonao volg weer 'n daoling nao Sjin. Noe evels góng 't neet laanks de Geul wijer, meh steeg me zuidwaarts euver de Keuteberg (32) nao Ingber. Me bleef daan hoeg fietse nao Sub (5) en daolde daan aof nao Valkeberg, um al veur d'n daarde kier de Cauberg (6) te beklumme. Ouch Houtem en Berg (7) woorte veur de daarde kier aongedoon.

In Berg naom me noe evels neet de groete weeg nao Sjaan, meh góng me euver de Bodemsweeg nao Amie. Vaandao góng 't nog eine kier nao Biemele (26); vaan dao-oet góng 't riechting Sub en direk nao Vild, boe me al drei kier waor gewees. Dat ligk al-evel op de Cauberg; umtot me hoeg bleef fietse, woort dee neet nog 'ne kier beklomme. Op de finish in Vild kós me dus 'ne sprint verwachte.

't Compleet parcours bedroog 263 kilometer.

In de hierekoers vörmde ziech 'n kopgróp vaan èlf, later tien renners, mèt dao-achter e peloton mèt favoriete. Dees situatie bleef laank dezelfde, tot Mathieu van der Poel op de Gulpenerberg demarreerde. Oetindelek sloot 't peloton achter häöm aon en woort op de Kruusberg ouch de kopgróp ingeloupe. Tegeliek veel 't peloton dao oeterein; zoe oontstoont 'n nui kopgróp mèt Julian Alaphilippe en Jakob Fuglsang. De achtervolgers Matteo Trentin en Michał Kwiatkowski kaome neet korterbij, zoe wieneg wie 't peloton. Op de Geulemerberg en Biemelerberg fragmenteerden 't peloton. Diverse renners dege nog demarrages; 't look mèt de twie aon kop woort evels allein mer groeter. Pas op 't vlaak stök roond Gastes begós de kopgróp snel tied te verlere. In de lèste kilometer slote de achtervolgers toch nog aon en kaom 'ne massasprint tot stand. Gans oonverwach waor 't Van der Poel dee won.^[1]

't Oonverwach ind maakde väöl positief reacties los. Lance Armstrong voont dit de 'bèste koers deen [heer] oets had gezeen'.^[2] De Belzje gezèt De Standaard neumde Van der Poel 'God'.^[3] 't Snel trökloupe vaan de veursprunk in de lèste oonderhave kilometer reep ouch vraoge op. Alaphilippe, tot kort veur 't ind de groete kanshöbber, meinde tot de tiedmeting (die häöm 'n menuut veursprunk op 't peloton gaof) neet klopde.^[4]

1. Mathieu van der Poel (NED)
2. Simon Clarke (AUS)
3. Jakob Fuglsang (DEN)

 

't Parcours vaan de vrouwlui waor korter en euverziechteleker, en maot in totaol 116,9 kilometer. Ouch de vrouwlui gónge vaanaof de Vriethof nao d'n Hussenberg (1), euver Groet Genhout (2) en Sjömmert nao Raor bij Meerse (3), um oetindelek in Voelender nao 't zuie aof te buige. Via d'n Ubachsberg (4) gónge zij evels nao Eys en Wahlwiller (5), boenao ze via Partij nao Eys trökkierde (6), klómme nao Elkerao (7) en via Etenaoke (8) nao Sjin fietsde. Vaandao góng 't direk weer umhoeg riechting Ingber (9), boevaan me euver 't plateau nao Sub rijde. Daan gónge ouch de vrouwlui umlieg nao Valkeberg veur de Cauberg te beklumme (10). Ze fietsde daan in e rundsje euver Vild, Houtem, Gäölemerberg (11), Amie, Biemelerberg (12) en daan weer Sub, Valkeberg en de Cauberg. In totaol dege ze 't gans rundsje drei kier en gónge ze veer kier de Cauberg op. De finish waor ouch hei in Vild.

Op 60 kilometer vaan de striep vörmde ziech 'n kopgróp mèt alle favoriete. Chantal Blaak, de winneres vaan veureg jaor, waor e bitteke krenkelek en kós neet gans mètkoume, al haokde ze nog wel e paar kier aon. Later braok die gróp in twieë, mèt drei rensters (Amanda Spratt, Katie Hall en Elisa Longo Borghini) in de kopgróp. Op 15 kilometer vaan de meet, op de Geulemerberg, woort de kopgróp ingeloupe, veural door 't veurtrèkkerswerk vaan Marianne Vos in de achtervolgersgróp. Roond Biemele deeg Longo Borghini 'n demarraasj. De favoriete zaogen 't op de Biemelerberg iers nog aon; allein Spratt en Molman slete ziech aon. Ouch zij woorte ingeloupe. Op de Cauberg veel de Poolse Katarzyna Niewiadoma aon; Vos en Annemiek van Vleuten perbeerde aon te haoke, meh Niewiadoma heel stand en won.^[1]

1. Katarzyna Niewiadoma (POL)
2. Annemiek van Vleuten (NED)
3. Marianne Vos (NED)

1. ↑ ^{1,0 1,1} Liveoetzending NPO 1
2. ↑ Nu.nl - 'Amstel Gold Race is beste koers die ik ooit gezien heb'
3. ↑ De Standaard - Thieu is Dieu! Van der Poel wint nu ook Amstel Gold Race na onwaarschijnlijke ontknoping waarin Alaphilippe de zege weggeeft
4. ↑ Nu.nl - Alaphilippe denkt dat tijdmeting onjuist was in bizarre finale Gold Race