Caraïbische eileng
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
De Caraïbe, de Caraïbische eileng of 't Caraïbisch gebeed besjtoon oet de Caraïbische Ziè, de oceaan rond de Bahama's en de versjillende eileng die in daes watere liegke. 't Groatse gedeilte van de eileng in 't Caraïbisch gebeed behuèrt tot de Antille. Inkel de Bahama's behuère neet tot de Antille.
't Gebeed lieg te zuudoaste van de Golf van Mexico en te noorde van Zuud-Amerika. 't Dank ziene naam aan de Caribe, 'ne sjtam dae hie leefde te tieje van de koms van de Europeane. De Caraïbe woorte in de kolonialen tied aangeduud mèt Wes-Indië of, in Koloniaal-Nederlands, de West: wiel Indonesië es de Oost bekind sjtong. De term Indië sjloog op e misversjtand van Columbus, dae dach in India te zin aangekomme wie hae es ièrsjte Europeaan in de Amerika's terech kaom.
De meiste geografe classificere de Caraïbe es deil van Noord-Amerika. Door cultureel reijes weure dees eileng ivvels soms es Zuud-Amerikaans geclacificeerd. Dat kump door 't klimaat, 't väöl gebruuk van 't Sjpaans (zoa'n 70% van de Caraïbische bevouking kalt Sjpaans, de res kalt Frans, Ingelsj en Nederlands), 't dominant Kathelicisme en de raciaal diversiteit (mèt name Latino's en zjwarte luuj).