Catharina-Amalia vaan de Nederlen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

H.K.H. Catharina-Amalia Beatrix Carmen Victoria vaan Oranje-Nassau, prinses vaan de Nederlen, roopnaom Amalia, (D'n Haag, 7 december 2003) is 'n Nederlandse prinses. Ze is 't ajdste keend vaan keuning Willem-Alexander en keuningin Maxima. Ze woort gebore es twiede in de lijn vaan troenopvolging; sinds häöre pa in 2013 de troen besteeg, is ze kroenprinses.

Amalia woort op 7 december 2003 gebore in 't Bronovohospitaol in D'n Haag. Häöre naom leekde kort nao häör geboorte oet doortot 't internètdomein catharina-amalia.nl woort gerezjistreerd. D'n duip veur de próttestantse kèrk waor op 12 juni 2004. Peters waore prins Constantijn, Marc ter Haar, Herman Tjeenk-Willink (veurzitter vaan de Raod vaan Staote) en Martin Zorreguieta; meters waore de Zweedse prinses Victoria en Samantha Rengers-Deane.

Amalia doorleep vaan 2007 tot 2015 de openbaar Bloemkampschool in Wassenaar, en góng daonao nao 't Christelijk Gymnasium Sorghvliet in D'n Haag (boe häör zösters later ouch woorte ingesjreve). Zoelaank ze nog gein achtien waor, woort ze gooddeils oet de publiciteit gehawwe. Wel waor ze es keend al presint op Keuningsdaag en bij officieel peersmominte (wie de traditioneel fotosessie op wintersport in Lech). Sporadisch gaof ze ouch korte interviews, beveurbeeld veur 't Jeugdjournaal op Keuningsdaag.

Op 8 december 2021, einen daag nao häören achtienden verjaordag, woort ze geïnstalleerd in de Raod vaan Staote. Dit waor d'n ierste kier tot ze laank in 't opebaar spraok. Noe ze mierderjaoreg is, zal ze, wienie d'n troen aon häör kump, ouch ech goon regere.

Dit artikel is gebaseerd op 't corresponderend Nederlandstaoleg artikel, en wel in dees versie.