ʻOumuamua
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
ʻOumuamua (officieel 1I/ʻOumuamua, ouch bekind es C/2017 U1 (PANSTARRS) en A/2017 U1) is 'n interstellair objek. 't Woort veur 't iers woergenome op 20 oktober 2017 door de Pan-STARRS-telescoop op Hawaï.
Besjrieving
[bewirk | brón bewèrke]
In ierste instantie woort gedach tot ʻOumuamua 'n asteroïed is die nao sjatting 200 x 30 x 30 meter groet is[1] en aofkomstig is vaan boete us zonnestèlsel. Op 't momint vaan oontdèkking bleek de asteroïed us zonnestèlsel alweer te verlaote. De snelheid boemèt de asteroide door de ruimte beweeg is zier groet, zoe'n 26 km/s. Roond 2022 zal zie boete de baon vaan Neptunus zien en euver oongeveer 20.000 jaor zal zie de Oort-wolk verlaote. Nui oonderzeuk liek evels aon te tuine tot ʻOumuamua neet rotsechteg is meh besteit oet ies, dus tot 't 'n komeet is[2]. De boetekant van de komeet is evels door mieljoene jaore bloetstèlling aon de interstellaire ruimte oetgedruug, en dao heet ziech 'n koors gevörmp vaan organische materiaole. Dit verklaort ouch boerum de typische start dee gezeen weurt bij komete hei neet gezeen weurt.
ʻOumuamua is 't allerierste interstellair objek wat is woergenome in eus zonnestèlsel. Boe 't objek vaandan kump is neet perceis bekind mer aongenome weurt tot 't kump oet de riechting vaan Vega in 't starebeeld Lier. 't Zal evels neet aofkomsteg zien vaan Vega umtot de reis die 't objek heet aofgelag veur 't in us zonnestèlsel kaom oongeveer 300.000 jaor heet gedoord en toen stoont Vega hiel örges aanders aon d'n hiemel.
Naom
[bewirk | brón bewèrke]De naom dee is vasgestèld door de IAU (Internationaole Astronomische Unie) is 1I/2017 U1. De I steit veur 'interstellair', de 1 umtot dit 't ierste interstellair objek is. Daoneve kraog 't objek ouch 'nen echte noam: ʻOumuamua (de okina ʻ huurt bei de naom) wat Hawaïaons is veur d'n ierste gezant vaan wied eweg.
Rifferenties
[bewirk | brón bewèrke]- ↑ Jewitt, David; Luu, Jane; Rajagopal, Jayadev; Kotulla, Ralf; Ridgway, Susan; Liu, Wilson; Augusteijn, Thomas (2017). "Interstellar Interloper 1I/2017 U1: Observations from the NOT and WIYN Telescopes". Submitted to Astrophysical Journal Letters, http://www2.ess.ucla.edu/~jewitt/papers/2017/JLR17.pdf.
- ↑ Fitzsimmons, Allan; Snodgrass, Colin; Rozitis, Ben; Yang, Bin; Hyland, Méabh; Seccull, Tom; Bannister, Michelle T.; Fraser, Wesley C.; et al. (2017). "Spectroscopy and thermal modelling of the first interstellar object 1I/2017 U1 ‘Oumuamua". Nature Astronomy, https://www.nature.com/articles/s41550-017-0361-4.