Maladia de Grave
La maladia de Grave es un maladia autoimune cual afeta la tiroide. Lo resulta comun en ipertiroidisme, e es la causa la plu comun de lo. Lo resulta comun ance en un tiroide grandida. Sinias e sintomes de ipertiroidisme pote inclui iritablia, debilia de musculos, problemes con dormi, un rapidia alta de la cor, tolera debil de calda, diarea, e redui nonintendeda de pesa. Otra sintomes pote inclui la spesi de la pel de la tibia e protende de la oios (como en la imaje a destra). Sirca 25 a 80% de persones con la maladia developa problems de la oios.
La causa esata no es clar, ma lo es crededa como un combina de fatores jenetical e ambiente. Un person es plu probable afetada si el ave un membro de sua familia con la maladia. Si un jemelo es afetada, un risca de 30% esiste ce la otra jemelo ta ave la maladia ance. La comensa de la maladia pote es causada par stresa, infeta, o pari. Estas con otra maladias autoimune como diabetes tipo un e artrite reumatoide grandi la risca. Fuma grandi la risca e pote mali problemes de la oios. La maladia resulta de un anticorpo, nomida imunoglobulin stimulante la tiroide, cual causa ce la tiroide produi tro multe ormon tiroidal. La diagnose es fundida sur sintomes, esaminas de sangue, e asorbe de radioiodo. Tipal, esaminas de sangue mostra un alti de T3 e T4, un TSH basa, un alti de asorbe de radioiodo en tota areas de la tiroide, e anticorpos TSI.
La tre alternativas per trata es terapia radioiodo, medisines, e sirurjia tiroidal. Terapia radioiodo envolve engoli iodo-131, cual es alora consentrada en la tiroide e destrui lo tra semanas o menses. La ipotiroidisme resultante es tratada con ormon tiroidal sinteseda. Medisines como blocantes beta pote controla alga sintomes, e antitiroidales como metimazol pote aida tempora en cuando otra tratas es atentada. Sirurjia per estrae la tiroide es un otra posible. Problemes con la oios pote nesesa otra tratas.
La maladia de Graves va developa en sirca 0.5% de mases e 3.0% de femas. Lo aveni sirca 7.5 veses plu comun en femes ca omes. Comun, lo comensa entre 40 e 60 anios, ma pote comensa a cualce eda. Lo es la causa la plu comun de ipertiroidisme en la SUA (sirca 50 a 80%). La maladia es nomida per Robert Graves, ci ia descrive lo en 1835.