Gordon Douglas

De Gordon Douglas, gebuer de 15. Dezember 1907 zu New York City, a gestuerwen den 29. September 1993 zu Los Angeles, war en US-amerikanesche Filmregisseur, Dréibuchauteur a Schauspiller.

Gordon Douglas
Gebuer	15. Dezember 1907 New York
Gestuerwen	29. September 1993 Los Angeles
Doudesursaach	Kriibs
Nationalitéit	USA
Aktivitéit	Schauspiller, Filmregisseur, Dréibuchauteur, Filmschauspiller, Regisseur

De Gordon Douglas huet seng Carrière an de Filmstudioe vum Hal Roach an den 1930er Joren ugefaangen. Vun 1935 bis 1938 huet hien als Regisseur fir déi selwecht Studioen 23 Kuerzfilmer aus der Serie Our Gang realiséiert.

Nieft Kaméidisfilmer mam Stan Laurel, Oliver Hardy an Jerry Lewis huet hien och Kriminalfilmer gedréint; erauszesträichen ass do d'Serie vu 4 Filmer ëm den Tony Rome mam Frank Sinatra an der Haaptroll. Am Joer 1954 hat hien och mat Them!, engem interessante Science-Fiction-Horrorfilm, e gewëssen Erfolleg am Box-Office.

Bedeitend Western huet hie mat Filmer wéi Yellowstone Kelly (1959) mam Clint Walker, Rio Conchos (1964) mam Richard Boone a Barquero (1970) mam Lee Van Cleef a Warren Oates realiséiert.

Säi leschte Film, Viva Knievel!, iwwer de Cascadeur Evel Knievel huet hien am Joer 1976 gedréint. Am September 1993 ass hien am Alter vu 85 Joer gestuerwen.