Richard Thaler

Richard H. Thaler (fæddur 12. september 1945) er bandarískur hagfræðingur og prófessor í atferlisvísindum og hagfræði við Booth School of Business í Chicago. Árið 2015 var Thaler forseti American Economic Association. Thaler hlaut Nóbelsverðlaunin í hagfræði árið 2017 fyrir framlög sín til atferlishagfræði. Árið 2018 var hann kjörinn meðlimur bandarísku Vísindaakademíunnar, The National Academy of Sciences.^[1]

Thaler fæddist í East Orange, New Jersey í gyðingafjölskyldu.^[2] Móðir hans, Roslyn var kennari og síðar fasteignasali^[3] á meðan faðir hans,^[4] Alan Maurice Thaler var tryggingafræðingur hjá Prudential Financial í Newark, New Jersey. Hann á þrjú börn frá sínu fyrsta hjónabandi og er nú giftur France Leclerc, fyrrum prófessor í markaðsfræði við háskólann í Chicago.

Thaler útskrifaðist frá Newark Academy,^[5] áður en hann lauk B.A. gráðu árið 1967 frá Case Western Reserve University.^[6] Hann lauk hlaut doktorsgráðu árið 1974 frá háskólanum í Rochester. Ritgerð hans "The Value of Saving A Life: A Market Estimate" var skrifuð undir handleiðslu Sherwin Rosen.

Thaler stofnaði ásamt fleirum eignastýringafyrirtækið Fuller & Thaler Asset Management árið 1993.

Thaler hefur starfað með hagfræðingum á borð við Daniel Kahneman, Amos Tversky að rannsóknum á raunverulegri efnahagslegri hegðun, bæði meðal neytenda og fjárfesta. Rannsóknir hans brúa hagfræði og sálfræði til að skilja hvað gerist þegar slakað er á klassískum forsendum hagfræðinnar um að einstaklingar séu full-upplýstir, skynsamir, og eigingjarnir. Í reynd hegði fólk sér ekki í samræmi við hinn skynsama og rökvísa homo-economicus.

Thaler er meðhöfundur ásamt Cass R. Sunstein að metsölubókinni Nudge (2008) þar sem hugtök atferlishagfræði eru notuð til að takast á við mörg af helstu vandamálum samfélagsins. Árið 2015 gaf hann út Misbehaving: The Making of Behavioral Economics. Hann hefur einnig skrifað eða ritstýrt fjórum öðrum bókum: Quasi-Rational Economics, The Winner's Curse: Paradoxes and Anomalies of Economic Life, og Advances in Behavioral Finance bindi I og II.^[7]

Richard H. Thaler fékk Nóbelsverðlaunin í hagfræði árið 2017 fyrir framlag sitt til atferlishagfræði.^[8]

1. ↑ „American Economic Association“. www.aeaweb.org. Sótt 4. september 2022.
2. ↑ „Jewish American wins Nobel Prize in economics“. The Jerusalem Post | JPost.com (bandarísk enska). Sótt 4. september 2022.
3. ↑ „Roslyn Thaler“. geni_family_tree. Sótt 4. september 2022.
4. ↑ „Alan Maurice Thaler“. geni_family_tree. Sótt 4. september 2022.
5. ↑ „Lumen, Spring 2016 by Newark Academy - Issuu“. issuu.com (enska). Sótt 4. september 2022.
6. ↑ „Alumnus Richard H. Thaler earns Nobel Prize for work in behavioral economics“. The Daily (bandarísk enska). 9. október 2017. Sótt 4. september 2022.
7. ↑ „Richard H. Thaler“. The University of Chicago Booth School of Business (enska). Sótt 4. september 2022.
8. ↑ „Richard H. Thaler“. The University of Chicago Booth School of Business (enska). Sótt 4. september 2022.