Juan José Romero Ramos

Ebanista, veciño de Rilo. Militou na ORGA. Co golpe de Estado do 18 de xullo de 1936 con Juan José Teijeiro Leira, Jesús Planas Rodríguez, José María Montero Martínez, Francisco Loureda Silvar, Ramón Díaz Pena, Agustín Veiga Hermida, Rogelio Casal Pérez, Juan Carnero Vázquez e José Rivas Fariña, asaltaron o pazo de Piñeiro na procura de armas o 21 de xullo; no tiroteo cos moradores morreron un dos donos e un crego. Foi detido e xulgado en Ferrol por rebelión militar. Condenado a pena de morte, a pena foi conmutada por cadea perpetua. Saíu en liberdade condicional en 1944 e traballou como grosista de chatarra. Incorporouse á guerrilla en 1947. Integrouse no Destacamento Arturo Cortizas da IV Agrupación do Exército Guerrilleiro de Galicia comandado por Adolfo Allegue Allegue, dedicándose a tarefas de transporte de armamento e propaganda. Foi detido en Irurtzun en xullo de 1948 con material para a guerrilla. Encartado na causa 370/48, foi xulgado na Coruña o 18 de outubro con José Gómez Gayoso, Antonio Seoane Sánchez, José Bartrina Villanueva, Carmen Orozco Muñoz e outros.^[1] Foi condenado a trinta anos de prisión. Saíu en 1966. Foi un dos promotores da Asociación de Ex-Presos Políticos e Persoas Afectadas por Actividades Político-Sociais constituída na Coruña en marzo de 1977.^[2] Finou en Ferrol o 3 de novembro de 1988.^[3]

• Domínguez Ferro, Manuel; Sobrino Ceballos, Juan J. (2004). "Riqueche. Vida e morte dun guerrilleiro antifranquista" (PDF). Cátedra. Revista eumesa de estudios (11): 125–156. Arquivado dende o orixinal (PDF) o 08 de xuño de 2013. Consultado o 16 de marzo de 2017. 
• Martínez, Lupe (2023). Guerrilleir@s antifranquistas da provincia da Coruña. Vigo: Galaxia. pp. 439–44. ISBN 978-84-1176-172-7. 
• Redondo Abal, Francisco Xavier (2006). Botarse ao monte. Censo de guerrilleiros antifranquistas na Galiza (1939-1965). Sada: Do Castro. p. 124. ISBN 84-8485-231-8.